АНУ-ын Ерөнхийлөгч Дональд Трамп-ын засаг захиргаа Ираны газрын тосонд тавьсан хоригоос 30 хоногийн хугацаанд түр чөлөөлөх шийдвэр гаргасан талаар тус улсын Сангийн сайд Скотт Бессент мэдэгдлээ. Тэрбээр энэ талаар X нийгмийн сүлжээнд нийтэлж, хэрэв Ираны газрын тос аль хэдийн далайд гарсан бол худалдан авахыг зөвшөөрөхөөр болсон гэдгийг онцолсон байна.
Түүний мэдээлснээр, одоогоор хоригт хамрагдсан Ираны газрын тосыг Хятад улс хямд үнээр худалдан авч байгаа бөгөөд уг түр зохицуулалтын хүрээнд дэлхийн зах зээлд ойролцоогоор 140 сая торх газрын тос нийлүүлэх зорилготой аж. Энэ нь дэлхийн эрчим хүчний хангамжийг нэмэгдүүлж, Иранаас үүдэлтэй нийлүүлэлтийн түр зуурын дарамтыг бууруулахад чиглэж байгаа гэж тайлбарлажээ.
С.Бессент “Баатарлаг хилэн” нэртэй ажиллагаа үргэлжилж байх хугацаанд газрын тосны үнийг тогтвортой, харьцангуй доогуур түвшинд барихын тулд Ираны нефтийг бодлогын хэрэгсэл болгон ашиглана хэмээн мэдэгдсэн байна. Үүнтэй төстэй зохицуулалтыг өмнө нь АНУ Оросын нефть, нефтийн бүтээгдэхүүнд хэрэгжүүлж байсан юм.
Харин Ираны Газрын тосны яам-ны төлөөлөгч энэхүү мэдэгдэлд хариу өгөхдөө, Иранд далайд байгаа эсвэл олон улсын зах зээлийг хангах хангалттай нөөц байхгүй хэмээн няцааж, Вашингтоны арга хэмжээ нь бодит нийлүүлэлтээс илүүтэй зах зээлд “сэтгэл зүйн нөлөө үзүүлэх, худалдан авагчдад итгэл төрүүлэх зорилготой” гэж мэдэгдсэн байна.
Ийнхүү АНУ-ын шийдвэр нь дэлхийн газрын тосны зах зээлд богино хугацаанд нөлөө үзүүлэх магадлалтай ч бодит нийлүүлэлт хэр хэмжээнд нэмэгдэх нь тодорхойгүй хэвээр байна.
Сэтгэгдэл бичих