Х.Нямбаатар: “Зургийг минь шатаасан ч би ажлаа л хийнэ” — Цагдаагийн байгууллагаас шалгаж байна

Хотын дарга Х.Нямбаатар-ын зургийг шатааж буй бичлэг 2026 оны гуравдугаар сарын 17-ны өдөр цахим орчинд тархаж, олны анхаарал татсан.

Уг асуудалтай холбогдуулан цагдаагийн байгууллагаас “Хан-Уул дүүргийн 23 дугаар хорооны иргэн Н-ээс ‘амь насанд заналхийлсэн утгатай, миний зураг бүхий самбарыг шатаан олон нийтийг эмх замбараагүй байдалд өдөөн турхирсан’ гэх гомдол мэдээлэл ирүүлснийг Хан-Уул дүүргийн цагдаагийн газар шалгаж байна” хэмээн мэдээлэв.

Харин хотын дарга Х.Нямбаатар энэ талаар тайлбар өгөхдөө “Миний зургийг шатаасан бичлэг явж байсан. Э.Бат-Амгалангийн эхнэрийн дүү байсан гэж ойлгосон. Гомдол гаргаагүй. Шатаавал шатаана биз, би ажлаа л хийе” гэсэн байр суурийг илэрхийллээ.

Мөн тэрбээр Ерөнхий сайд уржигдар Э.Бат-Амгалантай хамт дуудагдан уулзаж, сошиал дахь маргаанаа зогсоох чиглэл авсан талаар дурдсан юм. Түүнчлэн өөрийг нь жагсаал зохион байгуулсан гэх мэдээллийг үгүйсгэж, “ганц удаа лайв хийснээс өөр үйлдэл хийгээгүй” хэмээн мэдэгдэв.

Хотын дарга маргаанд төвлөрөхөөс илүүтэй ажлаа үргэлжлүүлэх байр суурьтай байгаагаа илэрхийлж, ойрын хугацаанд хэрэгжих томоохон төслүүдийг дурдсан. Үүнд:

• ТЭЦ-5 төслийн газар шорооны ажил

• Дамбадаржаагийн дэд станц

• Тойрог хурдны зам, трамвай төслүүдийн тендер (дөрөвдүгээр сар)

• Сэлбэ голын тохижилт

зэрэг ажлууд багтаж байна.