Төрийн захиргааны зардлыг бууруулах, чиг үүргийн давхардлыг арилгах бодлогын хүрээнд “Эрчист Монгол” төрийн өмчит хязгаарлагдмал хариуцлагатай компанийг татан буулгах шийдвэр гаргажээ.
Тус компанийг Ерөнхий сайд асан Л.Оюун-Эрдэнэ байгуулж байсан бөгөөд эрчим хүчний салбарын төрийн өмчит компаниудын 66 хувийн хувьцааны төлөөллийг “Эрчист Монгол” ХХК, үлдсэн 34 хувийг салбар хариуцсан төрийн захиргааны төв байгууллага хэрэгжүүлэх зохицуулалттай байсан юм.
Мөн “Эрчист Монгол” ХХК нь дараах төрийн өмчит компаниудын төрийн эзэмшлийн хувьцаа эзэмшигчийн эрхийг хэрэгжүүлэгчээр тогтоогдож байв. Үүнд:
-
“МИАТ” ТӨХК
-
“Монголын төмөр зам” ХК
-
“Авто замын засвар арчлалтын нэгтгэл” ТӨХК
-
“Автоимпекс” ХК
-
“Мэдээлэл холбооны сүлжээ” ХХК
-
“Төрийн орон сууцны корпораци” ХХК
Тухайн үеийн Засгийн газрын тогтоолоор дээрх компаниудын дүрэмд “Эрчист Монгол” ХХК-тай менежментийн гэрээ байгуулах, мөн тус компаниас Төлөөлөн удирдах зөвлөл болон хувьцаа эзэмшигчдийн хуралд төлөөлөгч томилж, чиглэл өгөх зохицуулалтыг тусгах үүргийг холбогдох албан тушаалтнуудад өгч байв.
Түүнчлэн 2025 оны гуравдугаар сарын 19-ний өдөр гарсан тогтоолоор эрчим хүчний салбарын төрийн өмчит компаниуд болон “Авто замын засвар арчлалтын нэгтгэл” ТӨХК-ийн гадаад зээлийн хугацаа хэтэрсэн өр төлбөрийг нэгтгэн баталгаажуулж, барагдуулах ажлыг зохион байгуулах үүргийг “Эрчист Монгол” ХХК-ийн Төлөөлөн удирдах зөвлөл (Б.Батцэцэг), гүйцэтгэх удирдлага (Г.Амартүвшин)-д даалгаж байсан юм.
Ийнхүү уг компанийг татан буулгаснаар төрийн өмчит компаниудын удирдлага, зохицуулалтын бүтэцт өөрчлөлт орох бөгөөд цаашид чиг үүргийн давхардлыг бууруулж, удирдлагын зардлыг хэмнэх зорилготой гэж үзэж байна.
Сэтгэгдэл бичих