АНУ-ын Ерөнхийлөгч Donald Trump Ираны эсрэг явуулж буй цэргийн ажиллагааг дуусгасны дараа Кубын талаарх бодлого, үйл ажиллагааны чиглэлийг боловсруулах төлөвтэй байгаагаа мэдэгдлээ.
Тэрбээр Цагаан ордонд болсон ёслолын үеэр АНУ-ын Төрийн нарийн бичгийн дарга Marco Rubio-д хандан “Та маш гайхалтай ажиллаж байна. Одоо Кубын асуудал дээр ч мөн адил үр дүнтэй ажиллана гэдэгт найдаж байна” хэмээн онцолсон байна.
Мөн Куба гаралтай Рубиод хандан “Та бусад хүмүүстэй хамт Кубад дахин очих нь зөвхөн цаг хугацааны асуудал. Гэхдээ тэнд үлдэхгүй, буцаж ирээсэй гэж найдаж байна” гэж хэлжээ.
Үүний зэрэгцээ Трамп Латин Америкийн бүс нутгийн нөхцөл байдлын талаар дурдахдаа Venezuela-д хэрэгжүүлж буй хамтын ажиллагаа амжилттай явагдаж байгааг онцолсон байна. Тэрбээр Венесуэлийн удирдлагатай хамтын ажиллагаа өргөжиж, тус улсаас газрын тос худалдан авч боловсруулж байгааг дурдсан юм.
“Бид Венесуэлээс олон зуун сая баррель газрын тос авч, Houston болон бусад газрын боловсруулах үйлдвэрүүд рүү илгээж байна. Венесуэлчүүд өмнө нь олж байснаас илүү их орлого авч байгаа” гэж АНУ-ын Ерөнхийлөгч мэдэгджээ.
Харин Америкийн The Atlantic сэтгүүл эх сурвалжуудад тулгуурлан мэдээлэхдээ Вашингтоны удирдлага Кубын эсрэг цэргийн ажиллагаа явуулах боломжийг судалж эхэлсэн байж болзошгүй гэж бичсэн байна. АНУ-ын зарим албан тушаалтнууд Iran болон Венесуэлийн эсрэг явуулсан бодлого, ажиллагаа тодорхой үр дүнд хүрсэн гэж үзэж байгаа бөгөөд үүний дараагийн чиглэл Куба байж магадгүй гэсэн таамаг дэвшүүлжээ.
Ийнхүү АНУ-ын гадаад бодлогын хүрээнд Латин Америкийн бүс нутагт чиглэсэн шинэ алхмууд хийх эсэх асуудал олон улсын анхаарлын төвд ороод байна.
Сэтгэгдэл бичих