7 дугаар сарын 23-наас 26-ны өдрүүдэд Монгол орны ихэнх нутгаар агаарын температур өмнөх хоногуудаас нэмэгдэж, төвийн аймгуудын нутгаар өдөртөө +30 градусыг давах бол говийн бүс нутгаар +38 градусыг давж аагтай халахыг Цаг уур, орчны шинжилгээний газраас онцгойлон анхааруулж байна.
Цаг агаар огцом дулаарч байгаатай холбогдуулан иргэд, наадамчид, ил задгай талбайд ажиллагчид болон холбогдох мэргэжлийн байгууллагуудад дараах сэрэмжлүүлэг, зөвлөмжийг хүргэж байна.
-
Наршилтаас сэргийлэх: Нарны малгай, шил, цайвар өнгийн хөнгөн хувцас өмсөх.
-
Шингэн сайн уух: Биеийн шингэн алдалтаас сэргийлж, цэвэр ус болон шингэн зүйлийг тогтмол ууж хэвших.
-
Наранд байх хугацаагаа зохицуулах: Нарны тусгал хамгийн хурц байдаг 11:00-16:00 цагийн хооронд наранд удаан байхгүй байх.
-
Эрсдэлт бүлэгт анхаарах: Хүүхэд, өндөр настан, жирэмсэн эмэгтэйчүүдэд тусгайлан анхаарал тавьж, халуунаас хамгаалах.
-
Сүүдрэвч ашиглах: Түр амрах сүүдэртэй газар, майхан, асар, шүхэр ашиглаж нарны шууд тусгалаас зайлсхийх.
-
Эрүүл мэндэд анхаарах: Толгой эргэх, дотор муухайрах, ядарч сульдах зэрэг наршилтын шинж тэмдэг илэрвэл нэн даруй сүүдэрт амарч, шингэн сайн уун, шаардлагатай бол эмчид хандах.
-
Машинд хүүхэд, амьтан үлдээхгүй байх: Халуун наранд зассан авто машинд хүүхэд, амьтныг хараа хяналтгүй үлдээх нь амь насанд аюултайг анхаарах.
Холбогдох мэргэжлийн байгууллагуудад өгөх зөвлөмж:
-
Мэдээлэл хүргэх: Иргэдэд цаг агаарын аюултай үзэгдлээс сэргийлэх мэдээлэл, зөвлөмжийг тогтмол хүргэж, анхааруулга өгч ажиллах.
-
Эрүүл мэндийн бэлэн байдал: Эрүүл мэндийн байгууллагууд наршилт, шингэн алдалтын эрсдэлээс сэргийлэх, тусламж үйлчилгээ үзүүлэх бэлтгэлийг бүрэн хангах.
-
Албан хаагчдаа хамгаалах: Онцгой байдал, Цагдаа, Нийтийн аж ахуйн байгууллагууд бэлэн байдлаа хангаж, ажиллаж буй албан хаагчдаа наршилтаас сэргийлэх арга хэмжээ авах.
-
Гэнэтийн аюулаас сэрэмжлүүлэх: Малчид, иргэдэд халууны дараах гэнэтийн аадар бороо, аянга цахилгааны аюулаас сэрэмжлүүлэх.
-
Шуурхай ажиллах: Цаг агаарын мэдээллийг тогтмол хүлээн авч, аялж зугаалах болон ажил хэргээ төлөвлөхдөө шаардлагатай арга хэмжээг шуурхай авч байх.
Сэтгэгдэл бичих