Өмнөд Солонгост нярай хүүхдийн амийг хөнөөсөн ноцтой хэрэгт холбогдсон эмнэлгийн ажилтнуудад шүүхээс хорих ял оноосон нь тус улсын нийгэмд хүчтэй шуугиан дэгдээгээд байна.
Сөүлийн төв дүүргийн шүүхийн шийдвэрээр эмнэлгийн захирал болон мэс заслын эмчийг нярай хүүхдийн амийг санаатай хөнөөсөн гэмт хэрэг үйлдсэн гэж үзэн буруутай гэж тогтоожээ. Мөрдөн шалгах ажиллагаагаар жирэмсний 36 долоо хоногтой эмэгтэйд кесарево хагалгаа хийж хүүхдийг төрүүлсний дараа амь насыг нь санаатайгаар хөнөөсөн болох нь тогтоогдсон байна.
Шүүхээс эмнэлгийн захиралд 6 жилийн хорих ял, мэс засал хийсэн эмчид 4 жилийн хорих ял оноосон бол уг хэрэгт холбоотой гэж үзсэн нярай хүүхдийн эхэд 3 жилийн хорих ял оноож, 5 жилийн хугацаагаар тэнссэн шийдвэр гаргажээ.
Мөрдөн шалгах ажиллагааны явцад хүүхдийг төрсний дараа амь насыг нь таслах зорилгоор хөлдөөгчид хийсэн болохыг тогтоосон бөгөөд шүүх уг үйлдлийг хүний амь насыг санаатайгаар хөнөөсөн ноцтой гэмт хэрэг гэж дүгнэсэн байна.
Энэхүү хэрэг анх 2024 онд ил болсон бөгөөд тухайн эмэгтэй жирэмслэлтээ сүүл үе шатанд зогсоосон тухайгаа цахим сүлжээнд нийтэлснээр олон нийтийн анхааралд өртөж, улмаар цагдаагийн байгууллага мөрдөн шалгах ажиллагаа эхлүүлсэн аж.
Уг хэрэг ил болсноор Өмнөд Солонгост үр хөндөлтийн хууль эрх зүйн зохицуулалт, эмнэлгийн ёс зүй, нярайн эрхийг хамгаалах асуудал дахин хөндөгдөж, эрүүл мэндийн салбарын хяналт, зохицуулалтыг чангатгах шаардлагатай гэсэн хэлэлцүүлэг өрнөөд байна.
Эх сурвалж: Korea JoongAng Daily,
Сэтгэгдэл бичих