Нэр бүхий иргэн эмнэлгийн байгууллагын ажилтнуудад төрийн дээд цол, одон медаль болон бусад байгууллагын шагнал олгуулж өгнө хэмээн төөрөгдүүлж, нийт 35 сая 970 мянган төгрөг залилсан хэргийг Эрүүгийн цагдаагийн албаны Эдийн засгийн гэмт хэрэгтэй тэмцэх газраас илрүүлэн мөрдөн шалгажээ.
Мөрдөн шалгах ажиллагааны дүнд уг хэрэгт холбогдсон этгээдийг Монгол Улсын Эрүүгийн хуулийн тусгай ангийн 17.3 дугаар зүйлийн 1 дэх хэсэг буюу залилах гэмт хэрэг үйлдсэн гэж үзэн шүүхэд шилжүүлсэн байна. Улмаар Сүхбаатар дүүргийн Эрүүгийн хэргийн анхан шатны шүүхээс түүнд гурван жил найман сарын хорих ял оноожээ.
Монгол Улсын Ерөнхийлөгчийн 1999 оны 71 дүгээр зарлигаар баталсан “Монгол Улсын цол хүртээх, одон медалиар шагнах журам”-д төрийн одон, медаль, цолыг хууль бусаар ашиглах, худалдан борлуулах, хуулбарлан олшруулахыг хориглодог.
Иймд төрийн шагналтай холбоотой асуудлаар хууль бус санал, амлалтад итгэхгүй байх, залилангийн шинжтэй үйлдлээс сэрэмжтэй байхыг цагдаагийн байгууллагаас иргэдэд анхаарууллаа.
Сэтгэгдэл бичих