“Корнелл”-д хүчингийн хэрэг үйлдсэн Монгол оюутны шүүх хурал маргааш болно

АНУ-ын Нью-Йорк хотын Томпкинс тойргийн шүүх энэ сарын 24-ний өдөр /Улаанбаатарын цагаар 25-ны өдөр/ хүчингийн хэрэг үйлдсэн Монгол оюутан Э.Билгүүнд холбогдох хэргийг шүүх хурал болох гэж байна.

Монгол Улсаас Корнеллийн их сургуульд суралцаж байсан Э.Билгүүнд холбогдох гэм буруугийн шүүх хурал өнгөрөгч 2025 оны 11 дүгээр сарын 17-нд эхэлж, 24-ний өдөр шийдвэр гаргасан билээ.

Шүүхийн ялны магадлал:

• “First-degree rape” буюу эхний зэрэг хүчингийн хэрэг нь Нью-Йорк мужид class B felony ангилалд багтдаг бөгөөд дээд тал нь 25 жил хүртэл хорих ял оноож болдог. Анх удаа гэмт хэрэг үйлдсэн, нөхцөл байдлын хөнгөлөлтийг харгалзан үзвэл бага ял оноож болох ч ихэвчлэн 5-25 жил хооронд ял оноох магадлалтай.
• “Second-degree burglary” буюу хоёрдугаар зэрэг хулгай оролт нь class C felony ангилалд багтдаг бөгөөд дээд тал нь 15 жил хүртэл хорих ял оноож болдог. Ихэвчлэн нөхцөл байдлаас хамаарч 2–10 жил хооронд ял оноох тохиолдол түгээмэл.
• Тиймээс хоёр гэмт хэргийн ял нийлээд, буруутай этгээд 5-25 жил хүртэл хорих ял авах магадлалтай гэж хуульчид үзэж байна.

Э.Билгүүн нь 2024 оны есдүгээр сарын 1-ний өглөө Корнеллийн их сургуулийн оюутны хотхонд бэлгийн хүчирхийлэл үйлдэж, улмаар есдүгээр сарын 12-ны өдөр баривчлан саатуулсан. Мөрдөн байцаалтын үр дүнд түүнийг бусдын орон сууцанд хулгайгаар нэвтэрч, биеэ хамгаалах чадваргүйг нь мэдсээр байж хүчингийн хэрэг үйлдсэн болохыг тогтоосон юм. Корнеллийн их сургуулийн оюутнуудын “Cornelians Only” инстаграм хуудаст мэдээлснээр Э.Билгүүн нь Дархан-Уул аймгийн харьяат “Томужин” альтернатив сургуулийн төгсөгч бөгөөд Олон улс ба нийгмийн эрүүл мэндийн чиглэлээр суралцдаг, 2027 оны төгсөлтийн ангийн оюутан байжээ.