Италийн Милан–Кортина хотноо зохион байгуулагдах Өвлийн XXV олимпын наадмын нээлтийн ёслолд өмсөх Монголын баг тамирчдын гоёл хувцас олон улсын хэвлэл, загварын салбарынхны анхаарлыг татаж байна. Үндэсний ноолууран бүтээгдэхүүнээрээ танигдсан Goyo Cashmere брэндийн урласан уг загвар нь уламжлал ба орчин үеийн шийдлийг хослуулснаараа онцлог болжээ.
Олимпын нээлт, хаалтын ёслолын хувцас нь тухайн улсын түүх, соёл, үнэт зүйлсийг илэрхийлдэг бэлгэдлийн шинжтэй байдаг. Энэ удаагийн загварт XIII–XV зууны Их Монгол Улсын үеийн дээл хувцасны хийц, эсгүүрийг суурь болгон ашиглаж, хөдөлгөөнд саад учруулахгүй хормойн оноо, салхи хүйтнээс хамгаалах мөөрөлжин зах, элэг тэвэрсэн битүү энгэр зэрэг уламжлалт шийдлүүдийг орчин үеийн загварт уялдуулан шингээсэн байна. Зөөлөн тансаг монгол ноолуурыг торгоор эмжин, эвэр угалз хээг нарийн хатгамлаар тодотгосон нь ёслол хүндэтгэлийн өнгө төрхийг илтгэнэ.
Мөн нүүдэлчдийн ахуй соёл, байгаль цаг уурын онцлогийг илтгэх ноосон сүлжмэл чөлөөт хослолуудыг танилцуулсан нь онцгой анхаарал татаж буй. Уулын спортод тохирсон дулаан цамц, гадуур хувцаснуудад монгол гэрийн дугуй хэлбэр, эсгий хийцийг санагдуулам дүрслэлүүдийг шингээсэн нь уламжлал, хэрэглээ хоёрыг уялдуулсан шийдэл болжээ.
Хувцасны үндсэн өнгө болох хар хөх нь монголчуудын бэлгэдэлд мөнх хөх тэнгэрийг илэрхийлдэг утгатай. Өндөр захтай дээл, уламжлалт нэхмэл, эсгүүрийг орчин цагийн дизайнаар дахин төсөөлсөн нь Монголын багийг дэлхийн спортын тайзнаа өвөрмөц төрхөөр тодруулах давуу тал болж байна.
Монголын баг өмнөх олимпуудад ч ёслолын хувцсаараа онцлог байсаар ирсэн. Тухайлбал, Турины 2006 оны өвлийн олимпод үндэсний хэв маяг шингээсэн үнэгэн арьсан малгайгаар жигдэрч байсан бол Сочигийн 2014 оны олимпод дотоодын брэндийн малгай, ороолтоор ижилссэн. Пёнчаны 2018, Бээжингийн 2022 оны өвлийн наадмуудад ч үндэсний өнгө төрхийг шингээсэн загваруудыг танилцуулж байв.
Ийнхүү Милан–Кортина 2026 олимпын нээлтэд Монголын тамирчид түүх, өв соёл, орчин үеийн загварыг хослуулсан ёслолын хувцастайгаа оролцохоор бэлтгэж байгаа нь зөвхөн спортын төдийгүй соёлын дипломат илэрхийлэл болж, дэлхий нийтийн анхаарлыг татсан хэвээр байна.
Сэтгэгдэл бичих