Хятад, Япон улсын хооронд Тайванийн асуудлаас үүдэлтэй дипломат маргаан тасралтгүй ширүүсч, хоёр орны харилцаанд олон түвшний дарамт бий болоод байна. Японы Ерөнхий сайд Санаэ Такачигийн “Тайваньд хүч хэрэглэвэл Японы аюулгүй байдалд ноцтой заналхийлэл үүснэ” гэсэн мэдэгдлийн дараа Бээжин хүчтэй эсэргүүцэл илэрхийлсэн нь өдөөн хатгалга гэж үзжээ.
Мэдэгдлийн дараахан Хятад улс Японы далайн бүтээгдэхүүний импортыг зогсоож, аялал жуулчлалын салбарт бойкот зарласан нь зөрчлийг эдийн засгийн түвшинд тэлсэн үйлдэл боллоо. Хятадын аялал жуулчлалын урсгал огцом буурснаар Японы үйлчилгээний салбарт бодит уналт үүсэж, зарим аймгуудад буудлын захиалгын хэмжээ хэд дахин багассан байна.
Аюулгүй байдлын тал дээр хоёр талын байр суурь улам зөрчилдөв. Хятадын эргийн хамгаалалтын хөлөг Сенкакү (Дяоюй) арлуудын орчимд үйл ажиллагаагаа нэмэгдүүлж, Японы тал үүнийг бүс нутгийн тогтвортой байдлыг алдагдуулах алхам гэж мэдэгдэв. Зарим тохиолдолд тэнгисийн дрон Японы хилийн бүс рүү нэвтэрсэн гэх мэдээлэл ч гарчээ.
Соёлын хүрээгээр ч тодорхой нөлөө гарч байна. Хятадад гарахаар төлөвлөсөн зарим Япон кино, үзвэрийн нэвтрүүлгийг хойшлуулсан бөгөөд Япон улс иргэддээ Хятадад зорчихдоо болгоомжтой байхыг анхааруулсан байна.
Одоогийн байдлаар хоёр улсын хоорондох дипломат шугам хаагдаагүй ч харилцан буулт хийх шинж харагдахгүй байна. Зөрчил үргэлжилбэл Зүүн Азийн аюулгүй байдал, худалдааны урсгал, бүс нутгийн стратегийн тэнцвэрт илүү өргөн хүрээтэй нөлөө үзүүлэх магадлалтай гэж шинжээчид үзэж байна.
эх сурвалж: reuters
Сэтгэгдэл бичих