Оросын цэргүүд Украин руу довтолсны хариуд иргэд, компаниудынх нь эсрэг авсан хориг арга хэмжээгээ Европын Холбооны гишүүн орнуудын эрх баригчид зургаан сараар сунгахаар тохиролцсон тухай тус холбооны гадаад хэрэг, аюулгүй байдлын бодлогын дээд төлөөлөгч Кая Каллас мэдэгдсэн байна.
Тэрбээр мөн Европын Холбоо Оросын эсрэг 19 дэх багц хоригийг боловсруулж дуусаж байгааг мэдээлсэн байна. К.Калласын хэлснээр, уг багц нь Оросын “сүүдрийн флот”, банкуудыг чиглэх бөгөөд Оросын нефтийн худалдаанд тавих нэмэлт хязгаарлалтуудыг багтаах ажээ. “Бид Путиний дайн хийх мөнгө олох боломжийг хаасаар байх болно” гэж Европын дипломатчдын тэргүүн онцолжээ.
Хэвлэлүүдэд мэдээлснээр, 19 дэх багц хориг арга хэмжээний хүрээнд Европын Холбоо Оросын иргэдэд аяллын виз олгох журмыг улам чангатгаж магадгүй байна.
Баасан гарагт мөн Япон, Шинэ Зеланд улсууд Оросын эсрэг шинээр хориг арга хэмжээ авснаа мэдэгджээ. Хоёр улсын эрх баригчид Оросын газрын тосны үнэд тогтоосон дээд хязгаарыг 60 ам.доллароос 47.6 ам.доллар болгон бууруулжээ. Энэ шийдвэр бол “Украины эсрэг Путиний хууль бус түрэмгий дайнд ашиглаж буй нефтийн гол орлогыг хаахад чиглэсэн “сайтар хэлэлцэж байж хийсэн алхам” хэмээн гэж Шинэ Зеландын Гадаад хэргийн сайд Уинстон Питерс мэдэгдсэн байна.
Японы эрх баригчид мөн 14 хүн, 51 байгууллагын хөрөнгийг царцаасан бол Шинэ Зеланд Украины эсрэг үйлдсэн кибер халдлагатай холбоотой Оросын 19 иргэн, компанид хориг арга хэмжээ авсан тухай тус улсын Гадаад хэргийн сайд мэдэгджээ. Их Британийн эрх баригчид мөн Оросын эсрэг хориг арга хэмжээ авсан байна.
Сэтгэгдэл бичих