Монголын хэвлэл мэдээллийн салбарт сэтгүүлч Н.Өнөрцэцэгийн нэр холбогдсон шүүх хурал улс төр, олон нийтийн анхаарлыг татаж байна. Тэрбээр үг хэлэх, үзэл бодлоо илэрхийлэх эрх чөлөөг хамгаалах үүднээс шүүх хурлаа нээлттэй, ил тод явуулах хүсэлт гаргасан боловч энэ хүсэлтийг шүүх хүлээн аваагүй юм. Хэвлэл мэдээллийн байгууллагууд, Хүний эрхийн Үндэсний Комисс (ХЭҮК), Монголын сэтгүүлчдийн нэгдсэн эвлэл (МСНЭ), зарим УИХ-ын гишүүд энэхүү хүсэлтийг дэмжиж, шүүх хуралдааныг нээлттэй явуулахыг уриалсан ч амжилтыг эс олов.
Нийслэлийн Эрүүгийн хэргийн давж заалдах шатны шүүхээс уг хэргийг “маш нууц” гэсэн ангилалтай тул хуралдааныг нээлттэй явуулах боломжгүй гэж мэдэгдсэн. Шүүхийн тайлбарт дурдсанаар, Төрийн болон албаны нууцын тухай хуулийн 18 дугаар зүйлийн 18.3 дахь хэсэгт “Энэ хуулийн 17.1-д заасан өөр өөр нууцын зэрэглэлтэй мэдээллийг агуулсан бичиг, бусад зүйлд хамгийн өндөр нууцын зэрэглэлээр нийтэд нь тэмдэглэгээ хийнэ” гэж заасныг үндэслэн төрийн нууцад хамаарах мэдээлэл бүхий хавтаст хэрэг нь бүхэлдээ “Маш нууц”-ын зэрэглэлд хамаарч нийтэд нь тэмдэглэгээ хийнэ.
Тодруулбал, Н.Өнөрцэцэгт холбогдох төрийн “маш нууц”-ын зэрэглэлтэй мэдээлэл, баримт хавсаргасан хавтаст хэрэг нь бүхэлдээ дээрх хуульд заасны дагуу буюу маш нууцын зэрэглэлд хамаарах тул шүүх хуралдааны зарим хэсгийг нээлттэй явуулах хууль зүйн боломжгүй болно гэжээ.
Өлсгөлөн ба суулт: Шүүх хурлыг нээлттэй болгох оролдлого
Сэтгүүлч Н.Өнөрцэцэг (2024.11.04) эхлэн шүүх хурлыг нээлттэй явуулахыг шаардаж, өлсгөлөн зарласан билээ. Мөн түүний гэр бүлийнхэн шүүх хурлын ил тод, нээлттэй байх шаардлагыг дэмжиж Хэлмэгдэгсдийн хөшөөний дэргэд суулт хийж эхэлсэн юм. Энэхүү үйл явдал нь зөвхөн нэг сэтгүүлчийн асуудал бус, олон түмний хэвлэлийн эрх чөлөөний төлөө, үг хэлэх эрх чөлөөний төлөөх тэмцэл болж буйг харууллаа. Гэвч өнөөдөр ахин Монголд хоёрдох, гуравдах Өнөрцэцэг тодрохгүй гэсэн баталгаа өгчих зоригтой хүн алга болжээ. Бид чинь 34 жилийн нүүрийг ардчилал хүний эрхийн төлөө зориулсан боловч амжилтыг эс олсон бололтой.
Сэтгэгдэл бичих