“Ковид19-ийн халдварын тархалт нэмэгдэж буйтай холбоотойгоор “Арбидол” эмийн эрэлт ихсэж, үнэ хөөрөгдөж, эмийн худалдаачид дамлан худалдаалж байгаа талаарх мэдээлэл олон нийтийн дунд тархаад буй юм. Энэ талаар Эм, эмнэлгийн хэрэгслийн хяналт, зохицуулалтын газрын дарга Б.Цэцэгсайхан мэдээлэл өглөө.
Тэрбээр “Хүний эмийн зөвлөлөөс нэг удаагийн эмийг импортлох зөвшөөрлийг аж ахуйн нэгжүүдэд өгөхдөө үнийн хөөрөгдөл бий болгохгүй байх заавар өгдөг. “Ачуур” компанийн тухайд, ЭМЯ-наас эм импортлох зөвшөөрлийг нь өгсөн. Үүсээд буй асуудалд тухайн компаниас тайлбар өгөхдөө, хил гаалийн улмаас нааш, цааш буцах асуудал үүсэж, эм тээвэрлэх өртөг өссөн учир эмийн үнэнд өөрчлөлт орсон гэсэн.
Импортын үнийн эм нэмэгдэхэд татвараас гадна тээврийн зардал нөлөөлдөг. Арбидолыг Москвагаас Турк, Туркээс Солонгос, Солонгосоос Улаанбаатар гэсэн маршрутаар оруулж ирж байгаа учир тээврийн зардал өндөр. Тээврийн зардал өмнөхөөсөө тав дахин өссөн байгаа нь эмийн үнэ өсөхөд нөлөөлсөн. Эмийн сан нь халдвар тарах өндөр эрсдэлтэй газар учраас халдвар хамгаалал, ариутгал хийх зардал нь дагаад өсдөг.
Манай байгууллага зах зээл дээр эмийн үнийн хөөрөгдөл гарсан эсэхийг тодруулахаар ажиллаж байна. ШӨХТГ-тай хамтарч, хяналт шалгалт хийж буй. Хамтарсан шалгалтын дүн маргааш, нөгөөдрөөс гарна.
Арбидол эм нь ширхгийн тооноос хамаарч хайрцгийн үнэ тодорхой болдог. Хайрцаг, тун хэмжээний ялгаанаас үүдэн төөрөгдөл гарсан байж магадгүй.Бид ААН болгонтой эмийн үнийг нэг бүрчлэн ярилцаж хэрэглэгчдийн гар дээр очих дээд үнийг хамтарч шийднэ” гэлээ.
Сэтгэгдэл бичих