Бага насны эрэгтэй хүүхэд бэлгийн хүчирхийлэлд өртсөн харамсалтай хэрэг өчигдөр буюу аравдугаар сарын 28-ны өдөр хуулийн байгууллагад бүртгэгджээ.
Тодруулбал, Баянхонгор аймгийн Хамгаалах байранд бэлгийн хүчирхийлэлд өртсөн байж болзошгүй 10 настай хүү хүргэгдэж ирсэн байна. Холбогдох албаныхан яаралтай шалгалтын ажиллагаа явуулж, сэжигтэн этгээдийг саатуулжээ.
Хэргийн шалгалтаар хохирогч хүүг Баянхонгор аймгийн Баянхонгор сумын нэгдүгээр багийн иргэн, 23 настай А гэгч хүчирхийлсэн болох нь тогтоогдсон байна. Тиймээс сэжигтэн этгээдэд хүүхэд хүчирхийлсэн, бэлгийн дур хүслээ ёс бусаар хангасан гэх үндэслэлээр эрүүгийн хэрэг үүсгэн шалгаж байгаа аж.
Хүүхдийг хүчиндэх гэмт хэргийн материалд хийсэн суурь судалгаанаас харахад бэлгийн хүчирхийлэлд өртөж, хохирогч болсон хүүхдийн тоо жилээс жилд нэмэгдсээр байна.
Хохирогч хүүхдийн 92.1 хувь эмэгтэй бол 3,9 хувь нь эрэгтэй хүүхдүүд байжээ. Иймд эцэг эх, асран хамгаалагч нар хүүхдэдээ тавих анхаарал халамжаа сайжруулж, гэмт хэргийн золиос болохоос сэргийлэх шаардлагатай байна.
Сэтгэгдэл бичих