Германы Золинген хотын нэгэн орон сууцнаас таван хүүхдийн цогцос олдсон байна. Цагдаагийнхан галт тэрэгний урдуур үсэрсэн 27 настай ээжийг хүүхдүүдийнхээ аминд хүрсэн байж болзошгүй гэж сэжиглэж байгаа аж.
Одоогоор уг хэргийн шалтгаан тодорхойгүй байна. Орон нутгийн цагаар 13:45 цагт яаралтай тусламжийнхан хэргийн газар очсон бөгөөд тус орон сууцанд нэгээс найман насны гурван охин, хоёр эрэгтэй хүүхдийн цогцос олджээ. 11 настай нэг хүү амь гарчээ.
Тухайн газраас 60 км-ийн зайтай амьдардаг хүүхдүүдийн эмээ Онцгой байдлын албанд дуудлага өгсөн байна. Хүүхдүүдийн ээж галт тэрэгний урдуур үсэрсний улмаас хүнд бэртсэн бөгөөд одоогоор эмнэлэгт цагдаагийн хяналт дор эмчлүүлж байгаа талаар цагдаагийн газраас мэдээлжээ.
Хотын захирагч Тим Куцбах Фэйсбүүктээ ‘Өнөөдөр Золинген хот даяар эмгэнэн гашуудаж байна’ хэмээн бичжээ. Хотын оршин суугчид орон сууцны гадна цэцэг тавьж, эмгэнэл илэрхийлсэн байна.
Эх сурвалж: BBC
