Япон улсын технологийн сургуулийнхны дунд зохион байгуулдаг ‘Ди-кон-2020’ тэмцээнд монгол оюутнууд амжилттай оролцлоо. Тэмцээнд Монгол Улсыг төлөөлж ‘Моко’ багийн залуус оролцсон байна. Манай улсын багт ШУТИС-ийн ‘Коосэн’ технологийн коллежийн оюутан Э.Өлзийсүрэн, ‘Шинэ Монгол’ технологийн коллежийн оюутан Г.Бат-Эрдэнэ, “Монгол коосэн” технологийн коллежийн оюутан Б.Энхманлай нар багтаж зохион бүтээсэн төхөөрөмжөөрөө өрсөлджээ.
Залуус ой хээрийн түймрийг эрт илрүүлэх төхөөрөмж зохион бүтээсэн юм. Тэдний бүтээсэн төхөөрөмжийг тэмцээний шүүгчид өндрөөр үнэлж тэрбум төгрөгөөр үнэлсэн бөгөөд эхний ээлжид 270 саяар санхүүжүүлэхээр болсон байна.
Улмаар тэмцээнд оролцсон 36 багаас долоодугаарт эрэмбэлэгджээ. Энэхүү тэмцээнд манай улсын оролцогчид анх удаа ур чадвараа сорьсон нь энэ юм. Тэмцээнийг цар тахлын улмаас цахим хэлбэрээр зохион байгуулсан ч манай залуус амжилттай оролцож чадлаа.
Тэмцээний дараа “Шинэ Монгол” технологийн коллежийн оюутан Г.Бат-Эрдэнэ ‘Энэ удаагийн тэмцээн бидний хувьд туршлага боллоо. Дараагийн тэмцээнд юунд анхаарах ёстойг ойлгууллаа’ хэмээн сэтгэгдлээ хуваалцав. “Моко” багийнхны зохион бүтээсэн системийг модонд байршуулснаар камерын тусламжтайгаар хаана гал гарч байгааг тогтоож, төвийн системд мэдэгдэх аж. Өөрөөр хэлбэл, хэн гал тавьсан болон хүний оролцоотой эсэхийг хянах боломжтой гэсэн үг. ‘Моко’ багийнхны оролцсон тэмцээнийг ирэх сарын 6,13-нд Японы NHK телевизээр гаргах ажээ. Технологийн сургуулийн оюутнууд бүтээсэн төхөөрөмжөө хөгжүүлж, гар утасны аппликэйшнтэй болгохоор төлөвлөжээ. Судалгаагаар 2035 он гэхэд хиймэл оюун ухааныг аж үйлдвэрийн салбартаа ашиглаж эхэлсэн орнуудын эдийн засгийн өсөлт хоёр дахин нэмэгдэх хандлагатай байгаа юм.
Эх сурвалж: ‘Монголын үнэн’ сонин
