АНУ-ын Калифорни мужид аянга буух үзэгдэл нэмэгдэж буй тул Сан Францискогийн эргийн бүсийн арван мянга гаруй оршин суугчдыг нүүлгэн шилжүүлжээ. Тус мужид ойрын арван жилд үзэгдээгүй аянгын шуурга болж байгаа бөгөөд зөвхөн энэ долоо хоногт 11 мянган удаа аянга буусны улмаас 370 орчим гал түймэр гарсан байна.
Сүүлийн мэдээгээр Сакраменто хотоос баруун өмнө зүгт 56 км-ын зайд 9 түймэр дэгдэж 105 байшин барилгыг сүйтгээд байгаа аж. Уг есөн түймэр нийлээд 530 км/кв талбайг хамраад байгаа нь Налайх дүүргийн газар нутгийн талтай нь тэнцэх хэмжээ юм.
Калифорнийн ойн түймрээс хамгаалах албаны мэдээлснээр түймэр минутын дотор 36 метр газрыг туулж дээд амжилт тогтоожээ. Салхи даган хурдацтай тархаж буй түймрийн улмаас одоогоор нэг хүн амь үрэгдэж, дөрвөн иргэн бэртэж гэмтээд байна.
Эх сурвалж: Washington Post, AlJazeera, CNN