2020 оны УИХ-ын ээлжит сонгуулийн санал хураалт өнөөдөр 07.00 цагт орон даяар эхлэн, ид үргэлжилж байна. Энэ удаагийн сонгууль коронавирусийн халдварын улмаас хөл хорио тогтоосон үед болж буйгаараа онцлогтой. Өнөө жилийн сонгуульд Монгол Улсын 2 сая 624 мянган иргэн 606 нэр дэвшигчээс сонголтоо хийнэ. Сонгуулийн санал хураалт эхэлснээр хотын дарга С.Амарсайхан гэр бүлийн хамт саналаа өглөө. Тэрбээр энэ тухайгаа хэлэхдээ:
“Энэ жилийн сонгууль журмын хүрээнд сайхан явагдаж байна. Түүнчлэн сонгогчдын боловсрол, мэдлэг, хандлага төлөвшил өөрчлөгджээ. Зохион байгуулалт өндөр, сайхан сонгууль үргэлжилж байна.
Миний хувьд энэ жилийн сонгуулиас гадна 4 удаа саналаа өгч байсан. Түүнчлэн хүү маань анхны сонгуулиа өгч байна. Энэ жил залуучууд давамгайлж оролцож байгаа нь талархууштай байна” гэв.
