Уулын баяжуулах Эрдэнэт үйлдвэрийн 49 хувийг ОХУ-ын талаас 2016 оны 6 сард Монголиан коппер корпорэйшн гэх компани худалдан авсан байдаг. Тус компани 400 сая ам долларын хөрөнгө босгож үйлдвэрийн 49 хувийг худалдан авахдаа тухайн үеийн эрх баригчидтай холбогдон төрийн мөнгө оролцуулсан хэргийг Засгийн газрын хэрэг эрхлэх газрын дарга ил болгосон. Уг нь бол худалдан авсан энэ ажиллагаа хууль бус гэж үзэн засгийн газар шүүхэд гомдол гаргасан ч 2017 оны 10 сард Улсын дээд шүүх хянаад нийслэл дэх захиргааны хэргийн анхан шатны шүүх рүү буцааж байсан удаатай. Үүнээс хойш Эрдэнэтийн 49 хувийг худалдан авсан хэрэгт Засгийн газар удаа дараа шүүх дээр ялагдсан. Харин үүний шалтгаан одоо тодорхой болж байгааг Засгийн газрын хэрэг эрхлэх газрын дарга хэллээ.
Улсын дээд шүүхийн шүүгч Мишгийн Батсуурь, СБД ийн эрүүгийн хэргийн анхан шатны шүүгч Хувьтөгөлдөрийн Идэр нарыг ашиг сонирхлын зөрчилтэй гэж үзэн Засгийн газрын хэрэг эрхлэх газраас гомдол гаргасан байна. Гомдлыг шалгасны үндсэн дээр шүүгчийн ёс зүйн хорооны тогтоол гарч Дээд шүүхийн шүүгч Батсуурьт сахилгын хэрэг үүсгэжээ.
Үүнээс гадна УИХ-ын гишүүнээр ажиллаж байсан Хувьтөгөлдөр нь Эрдэнэт үйлдвэрийн 49 хувийг худалдан авсан компанид цалин авч ажилладаг байсан нь тогтоогджээ. Харин түүний хүү Идэр СБД-ийн эрүүгийн хэргийн анхан шатны шүүхэд 49 хувьтай холбоотой хэргийг шүүсэн байдаг юм. Үүнийг шалгуулах хүсэлтийг Засгийн газрын хэрэг эрхлэх газар мөн өгсөн байна. Шалгасны дүнд шүүхийн ёс зүйн хороо нь Хувьтөгөлдөрийн Идэрийг хүүхэд байхаасаа аавтайгаа хамт байгаагүй тул түүнийг шүүгч болоход нөлөөлөөгүй нь ашиг сонирхлын зөрчил биш гэж үзэн сахилгын хэрэг үүсгэхээс татгалзжээ.
Сэтгэгдэл бичих