Эмнэлгийн тусламж авахаар очсон хүүхдэд тариа андуурч хийснээс хүүхдийн бие хүнд, сэхээн амьдруулах тасагт эмчлүүлж байгаа талаар И.Булган гэх эмэгтэй тусламж хүсэж, цахим хуудсанд нийтэлсэн нь олныг сэрдхийлгэв. Хүүгийн зураг үнэхээр сэтгэл өвтгөм байлаа.
Түүний хэлснээр 2019 оны наймдугаар сарын 19-ний өдөр Хан-Уул дүүргийн хүүхдийн эмчид хандан халуун бууруулах тариа хийлгэжээ. Гэтэл маргааш нь буюу наймдугаар сарын 20-ны өдөр тариулсан газар нь хөхрөлт үүссэн тул Эх, хүүхдийн эрүүл мэндийн үндэсний төв /ЭХЭМҮТ/-д очиж үзүүлтэл өмхий ногоон тос түрхээд явуулсан байна.
Удалгүй хүүхдийн биеийн байдал муудаж, өчигдөр буюу наймдугаар сарын 21-ний өдрийн 11:00 цагт Эх, хүүхдийн эрүүл мэндийн үндэсний төвийн эрчимт эмчилгээний тасагт хэвтсэн боловч оройн 17:00 цагт эмчилгээ эхэлжээ. Одоогийн байдлаар хүүхдийн дотор эрхтнүүд гэмтсэн ба эмчилгээгүй гэсэн хариулт өгчээ.
Хүүхдийн биеийн байдлын талаар Эх, хүүхдийн эрүүл мэндийн үндэсний төвийн дарга Ш.Энхтөртэй холбогдож, тодрууллаа.
Тэрбээр “Хүү мэс заслын тасгийн эрчимт эмчилгээний тасагт эмчлүүлж байгаа. Нэг удаа мэс засалд орсон. Бид хүүхдийн идээлсэн арьсыг зүсэлт хийж авсан. Хоёроос гурав хоногийн дараа хүүгийн бие сайжирна гэж бодож байна. Хан-Уул дүүргийн эмнэлэгт халуун бууруулах тариа хийлгэсний улмаас ийм зүйл болсон. Хүүхдийн бие сайжрахаар яг ямар тариаг ямар тунгаар, яаж хийснийг нь холбогдох албаны хүмүүс шалгаж тогтоох байх” гэв.
Сэтгэгдэл бичих