Дөрөвдүгээр сарын 17-19-ний өдрүүдэд ихэнх нутгийг хамран онц хүчтэй салхи, шороон болон цасан шуурганы аюултай болон гамшигт үзэгдэл ажиглагдах талаар цаг уурын байгууллага болон Онцгой байдлын ерөнхий газраас сэрэмжлүүллээ.
Уг үзэгдэл нь 17-18-нд шилжих шөнө баруун аймгуудаас эхлээд 19-нд зүүн аймгийн зүүн нутагт дуусах юм байна. Энэ үзэгдлийн үеэр агаарын температур өмнөх хоногоос 10-20 градусаар сэрүүсэж огцом хүйтрэлийн үзэгдэл давхар ажиглагдах аж.
- Дөрөвдүгээр сарын дүгээр сарын 17-18-нд шилжих шөнө Увсын өмнөд, Ховд, Говь-Алтайн хойд хэсгээр салхи секундэд 18-20метр, зарим үед 24 метрийг давж хүчтэй салхи, шороон шуурганы аюултай үзэгдэл,
- Дөрөвдүгээр сарын 18-ний өдөр Завхан, Хөвсгөл, Архангай, Булган, Орхон, Сэлэнгэ, Дархан,Төв аймгийн нутгаар нойтон цас, цас орж, цасан шуурганы аюултай үзэгдэл,
- Говь-Алтай, Баянхонгор, Өвөрхангай, Дундговь, Өмнөговийн нутгаар салхи секундэд 24-28 метр, зарим үед 34 метрийг давж хүчтэй салхи, шороон шуурганы гамшигт үзэгдэл,
- Дөрөвдүгээр сарын 18-19-нд шилжих шөнө Төв, Сэлэнгэ, Хэнтий, Дорнодын нутгаар нойтон цас, цас орж, цасан шуурганы аюултай болон гамшигт үзэгдэл, Өмнөговийн зүүн хэсэг, Говьсүмбэр, Дундговь, Дорноговийн нутгаар цасан болон шороон шуурганы аюултай үзэгдэл,
- Дөрөвдүгээр сарын 19-ний өдөр Дорноговийн зүүн хэсэг, Хэнтий, Дорнод, Сүхбаатарын нутгаар хүчтэй салхи, цасан болон шороон шуурганы аюултай болон гамшигт үзэгдэл ажиглагдана.
Халтиргаа гулгаа, мөстөлт үүсэх, зам, даваа цас, шороонд хаагдах, үзэгдэх орчин хязгаарлагдах, хээр, гадаа явах тохиолдолд осгож, хайрагдах нөхцөл бүрдэж байгааг онцгойлон анхаарууллаа.
Түүнчлэн өглөө нь дулаахан, тогтуун байсан ч огцом салхилж, хүйтэрдэг тул нимгэн хувцастай, бэлтгэлгүй хол замд гарснаас болж осгож хайрагдах, төөрөх эрсдэлээс сэрэмжлүүлэв.
Энэ үед мал аж ахуйн салбарт ямаа самнах, мал төллөх, отор нүүдэл хийх, нэмэгдэл тэжээл өгөх зэрэг ажил эрчимтэй явагдаж байгаа тул малчид, иргэд та бүхэн цаг агаарын аюултай үзэгдлээс урьдчилан сэргийлэх зорилгоор дараах зөвлөмжийг анхаарч мөрдөнө үү гэв.
Үүнд:
- Бага насны хүүхдийг малд явуулахгүй байх
- Малаа ойрын бэлчээрт, нөмөртэй газарт бэлчээх
- Төл малыг осгохоос хамгаалах, ямаа самналтыг хойшлуулах
- Төллөх дөхсөн малаа хотондоо байлгаж, төллүүлэх
- Төл, тарга хүч муутай мал, самнасан ямааг даарах, цасан шуурганд уруудах, осгохоос сэргийлэх
- Бэлчээр, өвс тэжээл багатай бүс нутагт малд нэмэгдэл тэжээл урьдчилж өгөх
- Отор нүүдлийг хойшлуулах, хол замд мал тууварлахгүй байх
- Үзэгдэх орчин хязгаарлагдаж, мал шуурганд уруудах эрсдэлийг онцгойлон анхаарах
Иргэд, малчид та бүхэн цаг агаарын анхааруулга, сэрэмжлүүлэг мэдээг тогтмол авч, урьдчилан сэргийлэх арга хэмжээг цаг тухайд нь авч хэрэгжүүлэхийг зөвлөв.
Мэдээлийн эх сурвалж: ikon.mn
Сэтгэгдэл бичих