Хүнс, хөдөө аж ахуй, хөнгөн үйлдвэрийн сайд Ц.Идэрбат яамны газар, хэлтсийн удирдлагуудтай уулзаж, салбарын бодлого, үйл ажиллагааны хэрэгжилт, тулгамдсан асуудал, цаашдын зорилт, арга хэмжээний талаар дэлгэрэнгүй ярилцаж, тодорхой үүрэг чиглэл өглөө.
Уулзалтын эхэнд сайд Ц.Идэрбат бодлого, төлөвлөлт, гүйцэтгэлийн уялдаа холбоог сайжруулж, үр дүнд суурилсан удирдлагын тогтолцоог бэхжүүлэх нь салбарын хөгжлийг шинэ шатанд гаргах гол нөхцөл гэдгийг онцлон тэмдэглэв. Түүнчлэн Улсын Их Хурал болон Засгийн газрын хуралдаанаар хэлэлцүүлэх асуудлуудыг чанартай судалгаа, бодит тооцоонд тулгуурлан боловсруулж, шийдвэр гаргах түвшинд бодитой нөлөө үзүүлэхүйц байдлаар танилцуулахыг үүрэг болголоо.
Экспорт, малын эрүүл мэндийн тогтолцоог олон улсын жишигт хүргэнэ
БНХАУ болон бусад улс оронд мах, махан бүтээгдэхүүн экспортлохтой холбоотой стандарт, шаардлагыг хангах ажлыг эрчимжүүлэх хүрээнд аж ахуйн нэгж, малчид, үйлдвэрлэгчдэд зориулсан нэгдсэн сургалт, мэдээллийг үе шаттай зохион байгуулах чиглэл өглөө.
Энэ хүрээнд малын эрүүл мэнд, гарал үүсэл, хяналт, баталгаажуулалтын тогтолцоог олон улсын жишигт нийцүүлж, мал эмнэлэг, хорио цээр, экспортын хяналтын тогтолцоог сайжруулах нь шинэ зах зээл нээх үндсэн суурь болохыг сайд онцлов.
Сүүний урамшуулал, хүнсний нөөцийн бодлогыг шуурхай шинэчилнэ
Сүүний салбарын хөгжлийг дэмжих зорилгоор сүүний урамшууллын журмын төслийг шуурхай боловсруулж, малчдын орлого болон эдийн засгийн өгөөжийг нэмэгдүүлэхэд чиглэсэн байдлаар танилцуулахыг холбогдох нэгжүүдэд даалгалаа.
Мөн хүнсний аюулгүй байдал, хангамжийг тогтвортой байлгах хүрээнд хүнсний нөөцийн удирдлагыг сайжруулж, үүсээд буй нөхцөл байдалтай уялдсан богино болон дунд хугацааны бодлогын арга хэмжээний санал боловсруулахыг чиглэл болгов.
Хаврын тариалалт, усалгааны шинэчлэлд онцгой анхаарна
Газар тариалангийн салбарт тариалангийн талбайн ашиглалт, бүтээмжийг нэмэгдүүлэх зорилгоор талбайн шинэчлэл, усалгааны системийн сайжруулалт, таримлын нэр төрлийн төрөлжилт, экспортын чиг баримжаатай үйлдвэрлэлийг дэмжих бодлогыг хэрэгжүүлэхийг үүрэг болголоо.
Мөн хаврын тариалалтын бэлтгэл ажлыг хугацаанд нь бүрэн хангаж, шатахуун, үр, бордоо, техник, санхүүжилтийн тулгамдсан асуудлыг шуурхай шийдвэрлэхийг холбогдох удирдлагуудад онцгойлон анхааруулав.
Төрийн сангуудын үр ашиг, ил тод байдлыг нэмэгдүүлнэ
Уулзалтаар Хоршоо хөгжүүлэх сан болон Жижиг, дунд үйлдвэрийг хөгжүүлэх сангийн хөрөнгийн зарцуулалт, үр өгөөжийг нэмэгдүүлэх, ил тод байдлыг сайжруулах, холбогдох журам, эрх зүйн орчныг боловсронгуй болгох шаардлагатайг мөн онцоллоо.
Мөн Алсын хараа-2050 болон 2026-2030 оны хөгжлийн таван жилийн үндсэн чиглэл, Засгийн газрын үйл ажиллагааны хөтөлбөрт тусгагдсан салбарын зорилт, арга хэмжээний хэрэгжилтийг эрчимжүүлэх, салбар хоорондын уялдаа холбоог сайжруулах талаар санал солилцов.
Гадаад хамтын ажиллагааны хүрээнд хөдөө аж ахуй, хүнсний салбарын хамтын ажиллагааг өргөжүүлж, экспортын шинэ зах зээл нээх, олон улсын стандартад нийцсэн үйлдвэрлэл, нийлүүлэлтийн сүлжээг бий болгоход онцгой анхаарч ажиллахаар боллоо.
Сэтгэгдэл бичих