АНУ-ын сансар судлалын NASA агентлагийн Artemis II хөтөлбөрийн сансрын нисэгчид хөлгийнхөө үндсэн хөдөлгүүрийг амжилттай асааж, Дэлхийн тойрог замаас гарч Сарыг чиглэн хөдөллөө. Энэхүү шийдвэрлэх маневрыг пүрэв гарагт гүйцэтгэснээр Сарыг тойрох түүхэн аялал албан ёсоор эхэлсэн талаар Хьюстон дахь Удирдлагын төвөөс мэдээлэв.
АНУ-ын гурван, Канадын нэг нисэгчээс бүрдсэн баг ийнхүү Сар руу чиглэсэн нислэгт орсноор хүн төрөлхтөн Apollo 17 хөтөлбөрөөс хойш анх удаа Сарны орчимд хүрэх гэж байна. Энэ нь хагас зуун гаруй жилийн дараах анхны хүнтэй сарны ойролцоох нислэг гэдгээрээ онцлог юм.
Orion хөлгийн үндсэн хөдөлгүүрүүд ажиллаж, Сар луу чиглүүлэх хүчтэй түлхэлтийг өгснөөр багийнхан Сарны тойрог замд орох замналдаа оржээ. Нийт 10 хоног үргэлжлэх тус даалгаврын хүрээнд тэд Дэлхийгээс ойролцоогоор 406 мянган км зайд хүрэх бөгөөд энэ нь хүнтэй сансрын нислэгийн түүхэнд шинэ дээд амжилт тогтоох төлөвтэй байна. Өмнөх дээд амжилтыг Apollo 13 тогтоож байв.
Хөлгийн багт командлагч Reid Wiseman, нисэгч Victor Glover, нислэгийн мэргэжилтэн Christina Koch болон Канадын сансрын нисэгч Jeremy Hansen нар багтжээ. Тэд Сарыг ойролцоогоор 6400 км зайтай тойрон ниссэний дараа Саран дээр буухгүйгээр эх дэлхийдээ буцаж ирэх юм.
Энэхүү нислэг нь ирээдүйд хүн төрөлхтнийг Сар дээр дахин буулгах, цаашлаад Ангараг гарагт хүрэх зорилгын чухал бэлтгэл шат гэж NASA үзэж байна.
Сэтгэгдэл бичих