“Нэгүүн.мн” сайтын цахим хуудсаар энэ сарын 18-ны өдөр албан өрөөндөө архидан согтуурч, зүй бус авирлаж буй албан тушаалтнуудын дүрс, бичлэг олон нийтэд цацагдсан нь анхаарал татсан. Уг бичлэг олон нийтийн сүлжээнд түгсэний дараа Хөдөлмөр, халамжийн үйлчилгээний ерөнхий газраас холбогдох албан хаагчийг үүрэгт ажлаас нь чөлөөлсөн тухай мэдэгдэл гаргасан юм.
Улмаар уг асуудалд Хан-Уул дүүргийн Цагдаагийн газрын нэгдүгээр хэлтсээс шалгалт явуулж, А.С, М.Э нарт холбогдуулан зөрчлийн хэрэг нээж, албадлагын арга хэмжээ авахуулж, шийтгэл оногдуулах саналыг энэ сарын 23-ны өдөр дүүргийн эрүү, иргэний хялбар ажиллагааны анхан шатны тойргийн шүүхэд хүргүүлжээ.
Шүүхээс зөрчилд холбогдогч А.С, М.Э нарыг Хан-Уул дүүргийн 20 дугаар хорооны нутаг дэвсгэрт байрлах Хөдөлмөр, халамжийн үйлчилгээний байгууллагын байранд архи согтууруулах ундаа хэрэглэсэн, улмаар тухайн үедээ сэтгүүлчдийг хэл амаар доромжилж, хэрүүл маргаан үүсгэн олон нийтийг үл хүндэтгэж танхайрсан гэж үзсэн байна.
Иймд Зөрчлийн тухай хуулийн тусгай ангийн 5.2 дугаар зүйлийн 1 дэх хэсгийн 1.1, 1.4 дэх заалтыг үндэслэн тэднийг зан үйлд нөлөөлөх 20 цагийн хугацаатай албадан сургалтад хамруулж, мөн 10 хоногийн хугацаагаар баривчлах шийтгэл оногдуулжээ.
Хуулийн уг заалтад олон нийтийн газарт болон орон байранд хэрүүл маргаан үүсгэх, мөн олон нийтийг үл хүндэтгэж танхайрах үйлдлийг зөрчилд тооцон хариуцлага хүлээлгэхээр заасан байдаг.
Сэтгэгдэл бичих