УИХ-ын гишүүн асан Б.Энх-Амгалан, Ерөнхийлөгчийн Тамгын газрын дарга асан З.Энхболд нарт холбогдох эрүүгийн хэргийн анхан шатны шүүх хурал өнөөдөр /2026.03.23/ болж, хурлыг ирэх дөрөвдүгээр сарын 13-ны 10:00 цаг хүртэл хойшлууллаа.
Тус хэргийг нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд хэлэлцэж байгаа бөгөөд өмнө нь гурван өдрийн турш шүүхээр хэлэлцсэн ч нэмэлт мөрдөн шалгах ажиллагаа шаардлагатай гэж үзэн 60 хоногийн хугацаатай хойшлуулах шийдвэр гаргаж байсан юм.
Эргэн сануулахад, З.Энхболд болон Б.Энх-Амгалан нарыг албан тушаалын байдлаа урвуулан ашиглаж, бусдад давуу байдал бий болгоход хамтран оролцсон гэх үндэслэлээр буруутайд тооцож, нийтийн албанд томилогдох эрхийг таван жилийн хугацаагаар хасаж, 40 сая төгрөгөөр торгох шийтгэл оногдуулж байв.
Харин давж заалдах шатны шүүхээс уг шийтгэх тогтоолыг хүчингүй болгож, хэргийг дахин анхан шатны шүүхээр хэлэлцүүлэхээр шийдвэрлэсэн. Үүний дараа анхан шатны шүүх З.Энхболдыг цагаатгаж, Б.Энх-Амгаланд хоёр жилийн хорих ял оноосон шийдвэр гаргаж байсан юм.
Сэтгэгдэл бичих