“Мерседес” багийн итали уралдаанч Кими Антонелли “Формула-1” ангиллын авто уралдааны дэлхийн аварга шалгаруулах тэмцээний 2026 оны улирлын II гараа буюу Хятадын Гран-прид түрүүллээ.
Хоёрдугаар байрт түүний багийн анд, Их Британийн тамирчин Жорж Расселл орсон бол гуравдугаар байрыг “Феррари” багийн британи уралдаанч Льюис Хэмилтон эзэлжээ.
“Мерседес” багийн бүрэлдэхүүнд уралдаж буй 19 настай Антонелли ийнхүү “Формула-1” уралдаанд анхны ялалтаа байгууллаа. Тэрбээр өмнө нь шагналын тавцанд дөрвөн удаа гарч байсан бөгөөд хоёр удаа хоёрдугаар байр, хоёр удаа гуравдугаар байр эзэлж байв.
Мөн Антонелли сүүлийн 20 жилийн хугацаанд “Формула-1”-д түрүүлсэн Италийн анхны уралдаанч боллоо. Өмнө нь хамгийн сүүлд 2006 оны Малайзын Гран-прид Жанкарло Физикелла түрүүлж байсан юм.
Түүнчлэн Антонелли “Формула-1”-д түрүүлсэн хамгийн залуу уралдаанчдын жагсаалтын хоёрдугаарт бичигдэж байна. Харин Нидерландын уралдаанч Макс Ферстаппен 2016 оны тавдугаар сард 18 нас 228 хоногтой байхдаа Испанийн Гран-прид түрүүлж байсан билээ.
Энэ удаагийн уралдаан эхлэхийн өмнөхөн машинд нь техникийн асуудал гарсны улмаас дөрвөн тамирчин гараанд гарч чадаагүй бөгөөд тэдний дотор дэлхийн аварга, “Макларен” багийн британи уралдаанч Ландо Норрис багтжээ. Мөн Макс Ферстаппен, “Астон Мартин” багийн испани уралдаанч Фернандо Алонсо, Канадын тамирчин Лэнс Стролл нар уралдаанаа бүрэн дуусгаж чадсангүй.
“Формула-1”-ийн дараагийн гараа гуравдугаар сарын 27–29-нд Японд болно.
Сэтгэгдэл бичих