Персийн булан дахь аюулгүй байдлын нөхцөл байдал хурцадсантай холбоотойгоор дэлхийн нефтийн тээврийн чухал гарц болох Ормузын хоолойн аюулгүй байдалд эрсдэл үүсээд байна. Энэхүү тэнгисийн хоолойгоор өдөр бүр дэлхийн газрын тосны томоохон хувь дамжин өнгөрдөг бөгөөд бүс нутгийн аливаа мөргөлдөөн нефтийн зах зээлд шууд нөлөөлдөг стратегийн бүсэд тооцогддог.
Мөргөлдөөн эхэлснээс хойш нефтийн үнэ огцом өсөх хандлага ажиглагдаж, олон улсын зах зээл дээр нэг баррель нефтийн үнэ 100 ам.долларт дөхөж очсон талаар олон улсын хэвлэлүүд мэдээлж байна.
Нефтийн зах зээлд үүссэн савлагааг бууруулахын тулд хэд хэдэн улс стратегийн нөөцөөсөө нефть гаргах талаар мэдэгдсэн.
АНУ стратегийн нефтийн нөөцөөс тодорхой хэмжээг зах зээлд нийлүүлэх боломжийг хэлэлцэж байгаа бол Япон улс стратегийн нөөцөөсөө нефть гаргах шийдвэр гаргасан тухай олон улсын хэвлэлүүд мэдээлсэн байна.
Мөн Европын зарим улс болон Азийн томоохон эдийн засагтай орнууд шаардлагатай тохиолдолд стратегийн нөөцөөс нийлүүлэлт хийх бэлэн байдалд шилжсэн талаар мэдээлжээ.
Сүүлийн өдрүүдэд Персийн булангийн бүсэд байрлах нефтийн байгууламжууд, агуулах, экспортын терминалуудын аюулгүй байдалд заналхийлэл нэмэгдсэн байна. Зарим нефтийн боомт, агуулахад гал гарсан, дрон болон пуужингийн довтолгоо болсон тухай мэдээллүүд гарсан нь нефтийн нийлүүлэлтийн тогтвортой байдалд эрсдэл учруулж байна.
Шинжээчдийн үзэж буйгаар стратегийн нөөцөөс нефть гаргах нь богино хугацаанд зах зээлийг тогтворжуулах боломжтой боловч мөргөлдөөн удаан үргэлжилбэл дэлхийн эрчим хүчний зах зээлд илүү том савлагаа үүсэх эрсдэлтэй байна.
Нефтийн үнэ өсөх нь зөвхөн эрчим хүчний салбарт төдийгүй дэлхийн эдийн засагт өргөн хүрээний нөлөө үзүүлдэг. Шатахууны үнэ нэмэгдэх нь тээвэр, үйлдвэрлэл, хүнсний салбарын өртгийг өсгөж, инфляц нэмэгдэх шалтгаан болдог.
Иймээс олон улсын байгууллагууд болон эрчим хүчний зах зээлийн шинжээчид Ойрх Дорнодын нөхцөл байдал цаашид хэрхэн өрнөхөөс дэлхийн нефтийн зах зээлийн тогтвортой байдал шууд хамаарахыг онцолж байна.
эх сурвалж:guardian
Сэтгэгдэл бичих