АНУ-ын ерөнхийлөгч Дональд Трамп Иранд цэрэг илгээхгүй гэж мэдэгдлээ. Тэрбээр “Энэ бол цагийн гарз. Тэд бүх зүйлээ алдсан. Тэнгисийн хүчнээ алдсан. Алдаж болох бүх л зүйлээ алдсан. АНУ, Израилийн хуурай замын довтолгоонд Иран бэлэн гэж Гадаад хэргийн сайд Аббас Арагчи мэдэгдсэн. Энэ бол дэмий хоосон тайлбар. Би Ираны яг одоогийн удирдлагын тогтолцоог л цэвэрлэхийг хүсч байна. Иранчуудыг сайн удирдагчтай болоосой гэж хүсч байна” гэжээ.
Израилийн арми өнгөрсөн шөнийн цохилтоор Тегеран дахь дэглэмийн дэд бүтцүүдийг онилсон байна. Мөн Бейрут дахь Хезболлагийн дэд бүтцийг онилсон гэж мэдэгджээ. Эдгээр нь Бямба гаригаас хойших 14 дэх удаагийн цохилт байв.
“Израиль анхны цохилтуудаараа агаарын давуу байдлыг бий болгож, баллистик пуужингийн байгууламжуудыг онилсон. Үүнээс цааш дэглэмийг нураах гэнэтийн зүйлс тохиолдох болно” гэж Батлан хамгаалах хүчний штабын дарга Эял Замир хэлэв.
Дашрамд дурдахад, АНУ-ын Сангийн яам Оросын газрын тосыг худалдан авах боломжийг Энэтхэгт олгож, хориг арга хэмжээгээ бага зэрэг сулруулжээ. 30 хоногийн чөлөөлөлт нь дэлхийн зах зээл дээр газрын тосны урсгалыг үргэлжлүүлэх боломжийг олгож, Ираны барьцаалалтаас үүдэлтэй дарамтыг бууруулна гэж Сангийн сайд Скотт Бессент мэдэгджээ. Энэ арга хэмжээ нь Оросын засгийн газарт санхүүгийн хувьд мэдэгдэхүйц ашиг өгөхгүй бөгөөд зөвхөн далайд гацсан газрын тостой холбоотой.
Сэтгэгдэл бичих