Эрчим хүчний сайд асан Н.Тавинбэхийн зөвлөхөөр ажиллаж байсан П.Товуудоржийг өнгөрсөн долоо хоногт шүүхийн шийдвэрээр сулласан байна. Прокуророос түүнийг үргэлжлүүлэн цагдан хорих санал гаргасан ч Дүүргийн Эрүү, Иргэний хэргийн хялбар ажиллагааны анхан шатны тойргийн шүүх уг саналыг хэрэгсэхгүй болгожээ.
Тэднийг Авлигатай тэмцэх газар (АТГ)-аас өнгөрсөн нэгдүгээр сард саатуулан шалгаж эхэлсэн юм. Мөрдөн шалгах ажиллагааны хүрээнд Н.Тавинбэхийг Эрчим хүчний яамны Төрийн нарийн бичгийн даргаар ажиллаж байхдаа БНСУ-ын “Эксим” банкны эх үүсвэртэй хөнгөлөлттэй зээлээр Монгол Улсын 10 аймагт дулааны станц барих төслийн зөвлөх үйлчилгээний 9 сая гаруй ам.долларын гэрээг байгуулсан гэж үзэж буй.
АТГ-ын мэдээлснээр уг төслийн зөвлөх үйлчилгээний төсвийг 2.6 сая ам.доллараар нэмэгдүүлж, Монголын нэр бүхий аж ахуйн нэгжид эдийн засгийн давуу байдал бий болгосон байж болзошгүй үндэслэлээр шалгаж байгаа аж. Тодруулбал, зөвлөх үйлчилгээ үзүүлэгч компанийн хувьд Н.Тавинбэхийг сайдаар ажиллаж байх үед нь зөвлөхөөр нь ажиллаж байсан П.Товуудоржийн үүсгэн байгуулсан “Грийн энержи интернэшнл” ХХК-д давуу байдал олгосон нь тогтоогдсон гэж АТГ-аас мэдэгдсэн байна.
Сэтгэгдэл бичих