Дорнод аймгийн Халхгол сумын нутагт энэ сарын 21-ний өдрөөс эхлэн байгалийн гамшигт үзэгдэл болж, улмаар зам, даваа хаагдаж, айл өрхүүдийн хашаа, малын бэлчээр цасанд дарагдсан нөхцөл байдал үүссэн.Үүнтэй холбогдуулан Улсын Онцгой комиссын IV хурлын тэмдэглэлээр өгсөн үүргийн дагуу цасанд боогдсон зам, давааг чөлөөлөхөд шаардлагатай хүн, хүч хэрэгслээр ханган, шаардлагатай шатахуун түлшний дэмжлэг үзүүлж, ЗХЖШ, Онцгой байдлын газрын алба хаагчид болон төрийн байгууллагууд, иргэд зам гаргах, айл өрхүүдэд тусламж үзүүлэх ажлыг зохион байгуулж байна.
Энэ талаар Дорнод айгийн Халхгол сумын засаг даргын тамгын газрын дарга Э.Мөнхчимэгтэй холбогдон тодруулахад “2026 оны хоёрдугаар сарын 25-ны өдрийн 20:00 цагийн байдлын мэдээллээр Дорнод аймгийн Халх гол сумын гурван багийн таван чиглэлд ажлын хэсгүүд ажиллаж байна. Таван чиглэлд нийт 10 бүлгийн 26 автомашин, 90 хүн үүрэг гүйцэтгэж байгаа.
Малчдын хашаа, хороог засварлуулах 55 хүсэлт ирснээс 41-ийг нь засварласан. 2025 оны мал тооллогоор 89934 толгой мал тоологдсоноос 43199 толгой мал уруудсан. Үүнээс 15017 толгой малыг олж, 28182 толгой мал одоогоор олдоогүй.
Хорогдлын мэдээгээр Ялалт багийн чиглэлд 83 хонь, ямаа, нэг үхэр, нийт 84 толгой малын хорогдол бүртгэгдсэн. Ташгай багийн чиглэлд 27 ямаа, 46 хонь, гурван үхэр, нийт 76 толгой малын хорогдолтой байна. Гурван багийн чиглэлд бүрэн нээгдсэн зам, чиглэл байхгүй. Харин хойд хэсгийн нэг чиглэл хэсэгчлэн нээгдсэн. Аймгийн Онцгой комиссын орлогч Ч.Ганбатаар ахлуулсан ажлын хэсэг, Иргэдийн хурлын төлөөлөгч н.Батмөнхөөр ахлуулсан бүрэлдэхүүн гурав дахь өдрөө ажиллаж байна. Өдөрт хоёр удаа Онцгой комисс хуралдаж, цаг үеийн нөхцөл байдалд тулгуурлан шийдвэрүүдийг шуурхай гаргаж байгаа. Мөн Зэвсэгт хүчний 326 дугаар ангиас 22 алба хаагч, дөрвөн автомашинтайгаар 10 тонн хивэг, 5 тонн тэжээл тээвэрлэн ирсэн. Алба хаагчид сумын Онцгой комиссын багтай хамтран айл өрхийн хашаа, хороо засварлах, цас цэвэрлэх ажлыг зохион байгуулж байна. Түүнчлэн авто клубын 20 хүний бүрэлдэхүүнтэй, зургаан автомашинтай баг гурав хоногийн хугацаанд мал хуйг эрэн хайх, уруудсан малыг илрүүлэх чиглэлээр ажиллаад өчигдөр орой буцсан” гэв.
Сэтгэгдэл бичих