Прокурор асан Э.Амарбат болон нэр бүхий долоон хүнд холбогдох эрүүгийн хэргийг Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүх хэлэлцэн шийдвэрээ танилцуулж, шүүхийн шийдвэрийг бүрэн эхээр нь нийтэллээ. Нийслэлийн Прокурорын газраас шүүгдэгч Б.Мандахбаяр, Ц.Гантулга, П.Энхтогтох, Э.Амарбат, П.Одонтунгалаг, Б.Батсүх, Ш.Батхолбоо нарт яллах дүгнэлт үйлдэж ирүүлсэн эрүүгийн 2202003650383 дугаартай хэргийг шүүх хянан хэлэлцсэн байна. Улсын яллагчийн зүгээс Ш.Батхолбоог “Худал мэдүүлэх” гэмт хэрэг үйлдсэн гэж үзсэн ч шүүхээс гэмт хэргийн шинжгүй гэж дүгнэн хэргийг хэрэгсэхгүй болгож, цагаатгасан юм. Мөн Э.Амарбатад холбогдох “Хахууль авах”, Б.Мандахбаярт холбогдох “Хахууль өгөх” гэх зүйл ангиудыг гэмт хэргийн шинж тогтоогдоогүй үндэслэлээр хэрэгсэхгүй болгожээ.
Харин Б.Мандахбаяр, Ц.Гантулга, П.Энхтогтох нарт холбогдох “нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж их хэмжээний хохирол учруулсан” гэх зүйлчлэлийг шүүхээс их хэмжээний хохирол тогтоогдоогүй гэж үзэн “албан тушаалын байдлаа урвуулан ашиглаж бусдад давуу байдал бий болгосон” хэмээн хөнгөрүүлэн өөрчилсөн байна. Улмаар Б.Мандахбаярыг эрх мэдэл, албан тушаалын байдлаа урвуулан ашиглах гэмт хэрэгт хатгагчаар оролцсон, залилах гэмт хэргийг их хэмжээний хохирол учруулж үйлдсэн, хүнийг амиа хорлох нөхцөл байдалд хүргэсэн, мөн хуульчийн мэргэжлийн үйл ажиллагааг хууль бусаар явуулахад хатгагчаар оролцсон гэм буруутайд тус тус тооцсон бол Ц.Гантулгыг албан тушаал урвуулсан хэрэгт гүйцэтгэгчээр, П.Энхтогтохыг хамжигчаар оролцсон гэм буруутайд тооцжээ. Э.Амарбатыг эрх мэдэл, албан тушаалын байдлаа урвуулан ашигласан, П.Одонтунгалагийг хуульчийн үйл ажиллагааг хууль бусаар явуулсан хэрэгт гүйцэтгэгчээр, Б.Батсүхийг уг хэрэгт хамжигчаар оролцсон гэм буруутайд тус тус тооцсон байна.
Шүүхээс ял шийтгэл оногдуулахдаа гэмт хэрэг үйлдсэн нөхцөл байдал, оролцооны хэлбэр, учруулсан хор уршиг, шүүгдэгч нарын хувийн байдал болон улсын яллагчийн санал зэргийг харгалзан шийдвэрлэсэн бөгөөд Б.Мандахбаярт нийтийн албанд томилогдох эрхийг дөрвөн жил, хуульчийн үйл ажиллагаа явуулах эрхийг нэг жилээр хасч, нийт есөн жилийн хорих ялыг нээлттэй хорих ангид эдлүүлэхээр тогтоожээ. Ц.Гантулга, П.Энхтогтох нарт нийтийн албанд томилогдох эрхийг дөрвөн жилээр хасч тус бүр 15 сая төгрөгийн торгууль, Э.Амарбатад мөн адил эрхийг дөрвөн жилээр хасч 27 сая төгрөгийн торгууль оногдуулсан байна. Харин П.Одонтунгалагт хуульчийн эрхийг хоёр жилээр хасч 10 сая төгрөгөөр, Б.Батсүхэд нэг жилээр хасч 5.4 сая төгрөгөөр торгох ял тус тус оноожээ. Түүнчлэн Б.Мандахбаяр, Ц.Гантулга, Б.Батсүх нарын цагдан хоригдсон хугацааг эдлэх ялд нь оруулан тооцсон байна.
Сануулахад, Э.Амарбат нь Улсын Ерөнхий Прокурорын газрын Дотоод аюулгүй байдлын хэлтсийн дарга, Авлигатай тэмцэх газрын Мөрдөх байцаах хэлтсийн дарга, мөрдөн байцаагчаар ажиллаж байсан бөгөөд 2024 оны арванхоёрдугаар сард авлигын хэрэгт холбогдон албан тушаалаасаа чөлөөлөгдөж байсан юм. Түүнтэй хамт нэр бүхий зургаан хүнийг Эрүүгийн хуулийн хэд хэдэн зүйл ангиар яллагдагчаар татан шүүхэд шилжүүлээд байсан юм.
Сэтгэгдэл бичих