Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөний хэрэгжилтийн үр дүн, явцын танилцуулга, үзэсгэлэн боллоо. Уг арга хэмжээнд Монгол Улсын Ерөнхийлөгч У.Хүрэлсүх, Ерөнхий сайд Г.Занданшатар, Тэргүүн шадар сайд бөгөөд Эдийн засаг хөгжлийн сайд Ж.Энхбаяр, нарын холбогдох албаныхан оролцов.
Энэ үеэр Хүнс хөдөө аж ахуй, хөнгөн үйлдвэрийн сайд М.Бадамсүрэн “Хүнсний хангамж, аюулгүй байдал” үндэсний хөдөлгөөний хэрэгжилт, ололт амжилтын талаар танилцууллаа.
Тэрбээр “Аливаа улс орны үндэсний аюулгүй байдалд хүнсний хангамжийн 70-аас доошгүй хувийг дотооддоо үйлдвэрлэх явдал нэн чухал. Монгол Улсын хэмжээнд энэ үзүүлэлтийг олон улсын жишигт хүргэх зорилго бүхий Төрийн тэргүүний санаачилсан энэхүү үндэсний хөдөлгөөн 2022 оны зургаадугаар сараас хэрэгжиж эхэлсэн. Энэ хугацаанд хүнсний салбарт 53 үйлдвэр ашиглалтад орж, 996 нэр төрлийн бүтээгдэхүүнийг шинээр нэвтрүүлжээ. Энэ бол бидэнд дотооддоо хүнсээ үйлдвэрлэх, хэрэгцээгээ хангах нөөц боломж хангалттай бий, гагцхүү хөнгөлөлттэй зээлийн бодлого, газар олголт, хууль эрх зүйн орчин, төрийн бодлого дэмжлэг гэдгийг харуулж байна” гэлээ.
“Хүнсний хангамж, аюулгүй байдал” үндэсний хөдөлгөөний хүрээнд нийт 1.3 их наяд төгрөгийн зээл олгосноос 48 хувь нь эргэлтийн хөрөнгийн, 52 хувь нь хөрөнгө оруулалтын зээл байна.
М.Бадамсүрэн сайд хөнгөлөлттэй зээлийн үр өгөөжийг нэмэгдүүлэхэд хөдөө аж ахуйн салбарт даатгалын тогтолцоо, зөвлөх үйлчилгээ чухал болохыг онцлоод цаашид газрын хэвлийн нөхөн сэргээгддэггүй баялгийн орлогоос үндэсний баялгийн санд төвлөрүүлэх хөрөнгөөс нөхөн сэргээгддэг салбар буюу хүнс, хөдөө аж ахуйн салбарыг дэмжих тогтолцоог бий болгох санал дэвшүүлж байн” гэв.
Хүнсний хувьсгалын үр дүнд гол нэрийн бүтээгдэхүүний үйлдвэрлэл элсэн чихэр, бүх төрлийн будаа, гахайн мах, жимс жимсгэнэ гэсэн дөрвөн нэр төрлөөр нэмэгджээ. Газар тариалангийн салбарт цагаан будаа, шар буурцаг, эрдэнэшиш, наранцэцэг, судан зэрэг 5 төрлийн шинэ таримал нэмэгдүүлсэн байна. Мөн хүнс, хөдөө аж ахуйн салбарын аж ахуйн нэгжийн тоо 47%-аар нэмэгджээ.
Тэрбээр танилцуулгынхаа төгсгөлд “Хүнсний хангамж, аюулгүй байдал” үндэсний хөдөлгөөний үр дүнг үнэлж, үргэлжлүүлэн хэрэгжүүлэх шаардлагатай. Салбарын яамнаас цаашид дотоодын хүнсний бүтээгдэхүүний эрэлтийг дэмжих, судалгаанд тулгуурлан үйлдвэрлэлийг оновчтой чиглэлд нэмэгдүүлэх, экспортыг нэмэгдүүлэхэд чиглэсэн гадаад худалдааны бодлого баримтлан ажиллана” гэлээ.
Энэхүү үзэсгэлэн арга хэмжээнд хүнсний чиглэлийн 35, газар тариалангийн чиглэлийн 12, мал аж ахуйн чиглэлийн долоо нийт 54 аж ахуйн нэгж уг үндэсний хөдөлгөөнийг хэрэгжүүлэх 3,5 жилийн хугацаанд Засгийн газрын дэмжлэгтэйгээр үйл ажиллагаага өргөжүүлж, бий болгосон 570 нэр төрлийн шинэ бүтээгдэхүүний дээжээ танилцуулав.
Сэтгэгдэл бичих