Монгол Улсад сүүлийн 10 жилийн дунджаар 16.5 мянган нас баралтын тохиолдол бүртгэгдсэнээс осол гэмтэл, гадны шалтгаант нас баралт 16,9%-ийг эзэлж, түүн дотор осол гэмтлийн 23,6%-ийг зам тээврийн осол эзэлж байна.
Төрөөс баримталж буй “Алсын хараа-2050” Монгол Улсын урт хугацааны хөгжлийн бодлогын баримт бичгийн 2.2.17. дахь заалт “Яаралтай түргэн тусламжийн үндэсний тогтолцоог шинэчлэн өөрчилж, онгоц, агаарын тээврийн үйлчилгээг тусламж, үйлчилгээнд нэвтрүүлэх”, Эрүүл мэндийн салбарын 2022-2025 оны стратеги төлөвлөгөөний зорилт 4-ийн хүрээнд “Яаралтай тусламжийн чанар, хүртээмж, чадавхийг үндэсний түвшинд сайжруулах”-аар тус тус тусгагдсан.
Амь тэнссэн үед эмнэлэг хүртэлх тусламж хамгаас чухал. Тиймээс түргэн тусламжийн үндэсний сүлжээг байгуулах, үйл ажиллагааг нэгтгэн зангидах үндэсний төвийг болгох, амилуулах болон лавшруулсан тусламжийг газар дээр нь үзүүлэх нэн шаардлагатай тоног төхөөрөмжийн хангамжийг нэмэгдүүлэх зэрэг бүтэц, зохион байгуулалтын дорвитой арга хэмжээг авах, түүнийг зохицуулах эрх зүйн орчныг бий болгоход онцгой анхааран ажиллаж байна.
Иймд түргэн тусламж үйлчилгээний өнөөгийн нөхцөл байдлын судалгааны дүнд үндэслэн Яаралтай түргэн тусламж, үйлчилгээний тогтолцооны шинэчлэлийг хийхээр өнөөдөр Яаралтай тусламж судлалын мэргэжлийн салбар зөвлөлийн гишүүд, Эрчимт эмчилгээ судлалын мэргэжлийн салбар зөвлөлийн гишүүд, аймаг, нийслэлийн эрүүл мэндийн газар, төрөлжсөн мэргэшлийн эмнэлгийн Яаралтай тусламжийн эмч мэргэжилтнүүдийн оролцоотой хэлэлцүүлэг зохион байгуулагдлаа.
Тус хэлэлцүүлгээр дэлхий дахинд мөрдөгдөж буй эмнэлэг хүртэлх яаралтай тусламжид мөрдөгдөж буй эмнэлзүйн удирдамж, заавар, олон улсын шилдэг туршлагуудын талаар санал солилцлоо.
Discussion about this post