Монгол Улсын Ерөнхийлөгч УИХ-д жилд нэг удаа үйл ажиллагааны тайлангаа тавьдаг хуультай. Уг хуулийн дагуу Монгол Улсын Ерөнхийлөгч Х.Баттулгын нэг жилийн ажлын тайланг Ерөнхийлөгчийн Тамгын газрын дарга З.Энхболд өнөөдөр /2019.01.31/ чуулганы нэгдсэн хуралдаанд танилцууллаа.
Танилцуулгатай холбогдуулан гишүүд сонирхсон асуултдаа хариулт авч байна. Тухайлбал, УИХ-ын гишүүн О.Баасанхүү “Ерөнхийлөгч тэтгэврийн зээлийг тэглэнэ” гэж хэлсэн хэмээн сануулаад “Ард түмэн шагналын асуудлаар их хандах юм. 23 настай хүүхэд “Алтан гадас” авчихаад байхад 23 жил ажилласан хүн “Алтан гадас” авч чадахгүй байна. Ингэж шагналд хандаж байхаар шударгаар сугалаагаар шийдэж болдоггүй юм уу” гэж асуухад Ерөнхийлөгчийн Тамгын газрын дарга З.Энхболд “О.Баасанхүү гишүүн Ерөнхийлөгч тэтгэврийн зээлийг тэглэнэ гэж амласан гэж цуурхал тараахаа болих хэрэгтэй. Ерөнхийлчид хандаж АН-аас тэтгэврийн зээлийн 3 их наяд төгрөгийг төлөхөд ард түмэндээ туслаарай гэж үүрэг ирсэн. Байгалийн баялгийн ногдол ашгаас төлөгдөх боломжтой. Удахгүй Тавантолгойгоос ногдол ашиг тараах гэж байна. Түүнийг юунд зарцуулах нь ард түмний шийдэх асуудал.
Шагналын хувьд үргэлж маргаантай байдаг. УИХ-ын гишүүд шагналын өргөдөл хүлээж авна гэсэн хууль байхгүй. Би шагнал шийдэж өгнө гэж гишүүд өргөдөл авахаа болиорой. Гишүүдийн шагналын хүсэлтийг бид хүлээж аваад байнга харгалзаж үздэг” хэмээн хариулсан юм.
Чуулганы нэгдсэн хуралдаан үргэлжилж байна.
Сэтгэгдэл бичих