Нийслэлийн Засаг даргын санаачилгаар эдийн засгийн эргэлтийг эрчимжүүлэх, жижиг, дунд бизнес эрхлэгчдийг дэмжих зорилгоор нийслэлийн Жижиг, дунд үйлдвэр үйлчилгээг дэмжих төвөөс сар шинийн баярыг угтан жил бүр “Амар байна уу” өргөтгөсөн үзэсгэлэн худалдааг уламжлал болгон зохион байгуулдаг. Энэ жилийн үзэсгэлэн худалдаа хоёрдугаар сарын 1-27-ны өдөр хүртэл үргэлжилнэ.
Нийслэлийн жижиг, дунд үйлдвэр, үйлчилгээг дэмжих төв” НӨҮГ-ын дарга Д.Ундармаа “Сар шинийн баярт зориулан гарын бэлэг болон бусад зүйлсийг авахаар иргэд БНХАУ руу олноор зорчдог. Улмаар зөвхөн сар шинийн баярын өдрүүдэд 1.3 их наяд төгрөг урагш валют болж гардаг тухай тооцоолол бий. Эдгээр шалтгааны улмаас “Амар байна уу” үзэсгэлэн худалдааг жил бүр зохион байгуулж, дотоодын бүтээгдэхүүнийг хямд үнээр худалдан авах боломжийг иргэдэд олгохыг зорьж буй.
Энэ жил ч мөн “Амар байна уу” үзэсгэлэн худалдааг зохион байгуулна. Энэ жилийн онцлог нь хотын А бүсэд болно. Талбайн түрээс урьдынхаараа үнэ, төлбөргүй хэвээр. Талбай үнэ төлбөргүй учраас борлуулж буй бүтээгдэхүүний үнэ хямд байх шаардлага тавьдаг.
Өнгөрсөн 2023 онд үзэсгэлэн худалдаанд оролцсон аж ахуйн нэгж, иргэд нийт 40 гаруй тэрбум төгрөг, 2024 онд 51 тэрбум төгрөгийн орлого олжээ” гэв.
Нийслэлийн Соёлын урлагийн газрын дарга Э.Цэнд-Аюуш “Манай Соёл урлагийн газар өнгөрсөн оноос эхлэн үзэсгэлэн худалдаанд хамтран ажиллаж байна. Нийслэлийн харьяа соёл урлагийн 11 байгууллага, 220 гаруй соёлын ажилтан, өвлөн уламжлагчид 21 хоногийн хугацаанд соёл, урлагийн үйл ажиллагаа явуулахаар төлөвлөж байна.
Сар шинийн баяр мэндлээд, уулзаад өнгөрөхөөс илүү өв соёлын том арга хэмжээ. Тиймээс 2 сарын 1-нд албан ёсны нээлтийг зохион байгуулна. Ингээд 27-ныг дуустал үйл ажиллагаа төлөвлөсөн. Иргэд худалдан авахын хажуугаар өв соёл, уламжлалтай холбоотой соёлын арга хэмжээ үзэж, сонирхох боломжтой” гэлээ.
Сэтгэгдэл бичих