Эрх чөлөөний эвсэл намаас энэ сарын 11-ний өдрөөс эхлэн зохион байгуулж буй жагсаалын эрч нэгэнт саармагжсан байна. Эрх чөлөөний эвсэл намын зүгээс: Засгийн газар огцор жагсаал Засгийн газартай аливаа хэлбэрээр зөвшилцөлд орохгүй, ямар нэг уулзалт яриа хэлцэл хийхгүй, тайлбар хүлээж авахгүй. Жагсаалын үндсэн шаардлага зорилгодоо хүрэх хүртэл үргэлжилнэ хэмээн мэдэгдэж байлаа.
Ингэхэд жагсаал яагаад зун болж болдоггүй юм бол хэмээн эрхгүй бодогдлоо. Үгүйдээ дулаахан учир хугацаа нь урт, жагсах хүн нь олон ирэх юм шиг. Гэхдээ амьдрал дээр жагсаал шамраг хаялж, хавсраг нүдсэн үед болдог гэж алдарт хар массын хаан поп С.Ганбаатар нэгэнтээ хэлж байсан. Энэ удаад жагсаалын зорилго үр дүнг тоочихоос өмнө хэн хэн ирэв. Ямар үйлдэл гаргав гэдгийг дурдах нь сонирхолтой болов уу.
Ламжавын Гүндалай жагсаалын туршид сошиал талбарт үзэл бодлоо илэрхийлж нээлттэй live хийв. Нэг ёсондоо нээлттэй микрофон ажиллуулав. Түүний зорилго цаад эрх ашиг юу байв. Бид Гүнээгээ тэртээ 2000 оноос хойш хангалтай сайн мэддэг болсон доо. Хотын дарга Х.Нямбаатар Богд уулыг нүхэлж туннел барина гэсэн. Магадгүй Гүнээ маань Богд ууланд авсан газраа хамгаалах гэх л болов уу.
Дараагийн талбай дээр идэвхтэй жагссан хүн бол Ц.Оюунгэрэл. Тэрээр УИХ-ын гишүүн, Засгийн газрын гишүүнээр ажиллаж байсан туршлагатай нэгэн. Ногоон нүдэн ламаас эхлээд хэд хэдэн ном гаргасан, сонинд нийтлэл бичдэг гэх зэргээс үзвэл муугүй л уншиж судалсан хүн гэмээр. Ардчилсан намд байхдаа МоАХ-ын харьяалалд байсан. Өөрөөр хэлбэл Женкогийн конопчин гэсэн үг л дээ. Одоо Иргэдийн оролцооны нэгдэл намын дарга. Мөн түүнийг гадаад нөхөртэй гэдгийг хүн бүхэн андахгүй. Мөн тэрээр Монголын улсын тусгаар тогтнол, эдийн засгийн аюулгүй байдалд туйлын ихээр санаа зовнидог мэтээр өөрийгөө сурталчлахыг хичээдэг. Гэхдээ нэг л тэмцэх учир аа олохгүй яваа хүн дээ. Тэрээр энэ жагсаалыг золтой л баярын жагсаал болгох дөхсөнийг хүрээний иргэд цөм үзсэн.
No war-ийн хэсэг залуус үзэгдэв. С.Эрдэнэ ба хүү Э.Одбаярын хоршил олны анхаарлыг татлаа. Аав нь Засгаас томилгоо авч дэд консул болж хүү нь Засгийг огцруулах жагсаалд оролцов. Гадаад харилцааны сайд Б.Батцэцэг хэлэхдээ дэд консул зөвхөн Монгол иргэдтэй харилцана заавал англи хэлтэй байхыг шаардахгүй гэв. Зөвхөн ийм хошин шогийн үзэгдлүүдийг Монголоос л харж болох юм даа. Ядахад С.Эрдэнийг Чикаго хотын Монголчууд хүлээж авахгүй гэж гарын үсэг цуглуулаад эхэлсэн гэнэ. Цаашид хэрхэхийг явж явж засаг л мэдэх болох нь дээ.
Засгийн газрын ордны хэсэгт “Засгийн газар огцор” талын хэдэн жагсагчдаас гадна Хөлсний жагсагчид зайл гэх уриа лоозон барьсан хэсэг жагсагчид зэрэгцэн гарч ирэв. Өөрөөр хэлбэл тэс хоёр өөр зорилготой жагсагчид байх нь. Бас болоогүй нар хэвийх орчимд хоорондоо зодолдсон гэх дам сураг дуулдана лээ. Талбайн төвд байх Сүхбаатарын хөшөөг тойруулан Засгийн газар огцор гэсэн том бичиг болон жижиг цаасан дээр хэвлэсэн сурталчилгааны материалууд байршуулсан харагдана. Ерөнхийдөө нийгмийн амьдрал нам тайван байдалд шилжин, иргэд хувь хувийн ажил төрөлдөө шуударсан бололтой.
Чанцалын Бэлгүүтээ
Сэтгэгдэл бичих