Хөвсгөл аймгийн Цагаан-Үүр сумын Уялган гол буюу гурван аваргын нутагт Монгол бөхийн баяр-ыг ирэх 7 дугаар сард зохион байгуулна гэдгийг Цагаан-Үүр сумын Засаг дарга Т. Ханддорж мэдээллээ.
Тус баяр нь бөхийн түүхэнд нэг голын 3 аварга гэж хүндлэгдсэн Уялган голын уугуул Монгол Улсын аварга Д.Дамдин, Ж.Цэвээнравдан, Ч.Бээжин нарын алдар гавьяаг мөнхжүүлэх зорилготой юм.
Энэ үеэр улс, аймаг, сумын алдар цолтой бөхийн барилдаан, дээд гурван насны морьдын уралдаан, бага насны болон өсвөрийн хүүхдийн барилдаан, сур харваа зэрэг болно.
Цагаан-Үүр сумын төвөөс зүүн тийш 30 км-ийн зайд Уялган гол байдаг.
Энэ голоос улс орон даяар нэр алдраа дуурсгасан Монголын гурван хүчит аварга Д.Дамдин, Х.Цэвээнравдан, Ч.Бээжин, улсын хурц арслан Ц.Бадамсэрээжид, Д.Доржготов, улсын гарьд Д.Баяраа, улсын начин Ц.Ванчинхорлоо, Ш.Ванчин, Д.Лхагва-Очир, Т.Бат-Эрдэнэ, А.Өлзийбаяр, Ц.Жадамбаа, Б.Баттогтох зэрэг аймгийн арслан, заан, начнууд төрсөн хүчтэний өлгий нутаг юм.
Иймээс тус баярыг Уялган голд 2023 онд анх зохион байгуулсан бөгөөд 2 жилд нэг удаа хийж байхаар болжээ.
Эх сурвалж; МОНЦАМЭ
Сэтгэгдэл бичих