СӨҮЛ, 2024 оны арванхоёрдугаар сарын 4 /Yonhap/. БНСУ-ын Ерөнхийлөгч Юн Сог Ёлийг огцруулах үйл явцыг /импичмент/ эхлүүлэх тухай сөрөг хүчнийхний өргөн барьсан хуулийн төслийг батлуулахгүйн тулд намаа нэгтгэнэ гэж эрх баригч “Ардын хүч” намын /АХН/ дарга Хан Дон Хун өнөөдөр мэдэгдлээ.
Гол сөрөг хүчин болох Ардчилсан нам болон бусад таван жижиг намын зүгээс Юн Сог Ёльд импичмент зарлах саналыг пүрэв гаргийн үүрээр Үндэсний Ассамблейн нэгдсэн хуралдаанд танилцуулсны дараа Хан Дон Хун дээрх мэдэгдлийг хийжээ. Импичментийн асуудлаар баасан гарагт санал хураалт явуулах төлөвтэй байна.
“Миний бие намын даргын хувьд олон нийт, дэмжигчдээ хохироохгүйн тулд импичментийг батлуулахгүй байх чиглэлд ажиллах болно” гэж Хан Дон Хун намын хурлын үеэр мэдэгджээ. Мөн энэ шийдвэр нь Юн Сог Ёлийн зарласан “Үндсэн хуульд харшилж буй онц байдлыг өмгөөлөх” зорилгогүй гэдгийг тодотгоод, Ерөнхийлөгчийг намаасаа гарахыг дахин уриалсан байна. “Үндсэн хуульд харшлах онц байдал зарлаж, олон нийтийг бухимдуулан хохироосон хүмүүс, тэр дундаа ерөнхийлөгчид хатуу хариуцлага тооцох ёстой” гэж тэрбээр хэлжээ. Сөрөг хүчний 191 хууль тогтоогчийн өргөн барьсан Ерөнхийлөгчид импичмент зарлах тухай хуулийн төслийг батлахад парламентын гишүүдийн гуравны хоёрын санал шаардлагатай.
Үндэсний Ассамблей 300 гишүүнтэй тул сөрөг хүчин хуулийн төслийг батлахын тулд АХН-аас сонгогдсон найман депутатын саналыг авах шаардлагатай байгаа юм.
Үүний зэрэгцээ Өмнөд Солонгосын 10 иргэн тутмын 7 нь онц байдал зарласных нь төлөө Ерөнхийлөгч Юн Сог Ёлийг огцруулахыг дэмжиж байгааг “Realmeter” судалгааны төвөөс явуулсан санал асуулгын дүн харууллаа. Тус төвийн мэдээлснээр, 18 ба түүнээс дээш насны 504 хүний дунд явуулсан судалгаагаар 73.6 хувь нь Юн Сог Ёлийг огцруулахыг дэмжиж, 24 хувь нь эсэргүүцсэн байна. Түүний үйлдлийг эх орноосоо урвасан гэж үзэх үү гэсэн асуултад оролцогчдын 70 хувь нь тийм гэж хариулжээ.
Э.Хулан
Эх сурвалж: Монцамэ агентлаг
Сэтгэгдэл бичих