Нийслэлийн засаг дарга асан С.Батболд өнгөрсөн оны сүүлээр ажлаа хүлээлгэн өгсөн. Үүнтэй холбогдуулан, Нийслэлийн МАН-ын тэргүүлэгчид хуралдаж, НИТХ-ын дарга С. Амарсайханыг хотын даргад нэр дэвшүүлэх санал гаргасан билээ. Улмаар МАН-ын Удирдах зөвлөлөөр Нийслэлийн МАН-ын тэргүүлэгчдийн шийдвэрийг 100 хувь дэмжсэн юм.
Ингэснээр хотын даргад өнөөгийн НИТХ-ын дарга С.Амарсайханыг томилох эсэх асуудлыг НИТХ-аар хэлэлцэн батлах асуудал хүлээлтэд шилжсэн. НИТХ өнгөрсөн оны ажлын сүүлийн өдрүүдэд хуралдахаар тов зарласан ч ирц бүрдээгүй байсаар, ажлын цагаа дуусгасан тул тов цуцлагдсан юм. Тиймээс НИТХ-ын тэргүүлэгчид дахин хуралдаж, НИТХ-ын товыг өнөөдөр болгон зарласан.
Энэ дагуу өнөөдрийн НИТХ-аар хотын даргаар С.Амарсайханыг томилох эсэх асуудлыг хэлэлцэн шийдвэрлэнэ. Одоогоор С.Амарсайхантай заалнаас нэрээ дэвшүүлэн өрсөлдөх төлөөлөгч гарч ирэхгүй гэх таамагтай байгаа юм. Мөн өчигдөр МАН-ын Удирдах зөвлөл хуралдаж, НИТХ-ын даргад Р.Дагвыг нэр дэвшүүлэх шийдвэр гаргасан.
Энэ нь “Хотын даргын томилгоо ерөнхий байдлаараа өрсөлдөгчгүй явагдана. С.Амарсайхан хотын дарга болчих тул НИТХ-ын даргыг шууд томилох нь зүйтэй” гэсэн зарчмын санал дээр МАН дотооддоо нэгдснийг харуулав. Өнөөдөр НИТХ хотын даргын томилгооны асуудлыг хэлэлцсэний дараа үргэлжлүүлэн, НИТХ-ын даргаар Р.Дагвыг томилох эсэх асуудлыг хэлэлцэнэ.
НИТХ-ын төлөөлөгч Р.Дагвын хувьд НИТХ дахь МАН-ын бүлгийн даргаар томилогдох асуудал өмнө нь яригдаж байсан. Тэрээр С.Амарсайханы оронд НИТХ-ын даргаар томилогдох хамгийн боломжтой хүмүүсийн нэгээр нэрлэгдэж байсан билээ.Тиймээс өнөөдөр С.Амарсайхан, Р.Дагва нарын томилгоо “ногоон гэрэл”-ээр явна гэсэн чигтэй байна.
Бид мэдээллийг цаг тухайд нь шуурхай хүргэх болно.
Ж.МЯДАГБАДАМ
Сэтгэгдэл бичих