Томуу, томуу төст өвчний дэгдэлтийн үед бага насны хүүхэдтэй эцэг, эхчүүдэд 3-5 хоногийн цалинтай чөлөө олгох саналыг Эрүүл мэндийн сайд Д.Сарангэрэл өнөөдөр болсон Улсын онцгой комиссын хуралдааны үеэр гаргалаа.
Эрүүл мэндийн сайд Д.Сарангэрэл “Урьдчилсан байдлаар Нийгмийн хамгаалал, хөдөлмөрийн сайдтай ярилцсан. Маргаашийн Засгийн газрын хуралдаанд асуудлыг оруулж ирэх байх гэж бодож байна” гэлээ.
2017 оны арванхоёрдугаар сард томуу, томуу төст өвчин дэгдэх магадлалтай 1-3 дугаар сард тав хүртэлх насны хүүхдээ эмнэлэгт, гэрээр асарсан, ажил хийж байгаа эх, эцэг, асран хамгаалагч нарт тав хүртэл хоногийн цалинтай чөлөө олгохыг төрийн бүх шатны байгууллагад үүрэг болгож, хувийн хэвшлийн байгууллагад зөвлөмж болгож байсан билээ.
Мөн Улсын онцгой комиссын хуралдааны үеэр Эрүүл мэндийн сайд насанд хүрэгчдийн хэвтэж эмчлүүлдэг бүх тасгаа хүүхдийн ор болгосон ч ачааллаа дийлэхгүй байгаа тул нийслэлд эхний ээлжинд 500-гаас доошгүй хүүхдийн ортой эмнэлэг байгуулах саналыг оруулжээ.
Түүнээс гадна хүн амын 40-45 хувийг вакцинд хамруулдаг болох саналыг оруулсан байна. 1.4 сая хүн тун вакцин авахад шаардлагатай 10 тэрбум төгрөгийн санхүүжилтийг 2020 оны төсөвт суулгаж өгөх саналыг оруулсныг дэмжсэн байна.
Сэтгэгдэл бичих