“Мета компанийн Төв Ази, Монгол, Хятадыг хариуцсан захирал Жорж Ченийг ажлаас нь халж өгөх тухай албан бичгийг ирэх даваа гарагт /2023.02.06/ Мета компани руу явуулна” хэмээн ХЗДХ-ийн сайд Х.Нямбаатар мэдээллээ.
Тусгаар улсын яамыг олон нийтийн хэрэгслээр илтэд гүтгэсэн. Иймээс нэр төрд нь халдсан үйлдэлд уучлал гуйх ёстой гэж ХЗДХ-ийн сайд хэллээ. “Өнгөрөгч оны дөрөвдүгээр сард Жорж Чен гэдэг хүнтэй уулзаж, хамтын ажиллагааны талаар ярилцсан. Надад хоёр цагийн аудио бичлэг, уулзалтын протокол байгаа. Мета компани улсын дотоод хэрэгт оролцох ёсгүй. Манай зарим албан хаагч руу дарамталсан мэйл явуулсан, хоригт оруулна гэж хэлсэн. Мета руу явуулах албан бичигт энэ бүх баримтыг хавсаргана. Хэрэв уучлал гуйхгүй бол шүүхэд хандана” гэлээ.
Эргэн сануулахад Мета компанийн Төв Ази, Монгол, Хятадыг хариуцсан захирал Жорж Чен ХЗДХ-ийн сайд Х.Нямбаатарыг худлаа ярьсан хэмээн твиттерт жиргэсэн билээ.
Тодруулбал 2022 оны есдүгээр сарын 20-нд Цахим орчинд хүний эрхийг хамгаалах тухай хуулийн төсөлд Meta компаниас хамтрах тухай Twitter-т жиргэж байв.
Тэрээр “Мета компанийн Төв Ази, Монгол, Хятадыг хариуцсан захирал ноён Жорж Чентэй уулзаж ХЗДХЯ-наас боловсруулсан Цахим орчинд хүний эрхийг хамгаалах тухай хуулийн төсөл дээр хамтарч ажиллах, Мета платформын мэдээллийн аюулгүй байдлыг хамгаалах багтай хамтарсан ажлын хэсэг байгуулахаар боллоо” хэмээсэн юм.
Харин түүний энэхүү мэдээлэл ташаа болохыг Жорж Чен өөрийн Twitter хаягаар дамжуулан мэдэгдсэн. Тэрээр “Үнэндээ бид хуулийг яаравчлан батлахаас өмнө төсөлтэй нь танилцаагүй. Харин аль хэдийн батлагдсан хойно анх удаа харсан” хэмээжээ.
Сэтгэгдэл бичих