Монгол, Хятадын хилийн Замын-Үүд, Эрээн авто замын боомтын зорчигч тээврийн хөдөлгөөнийг нэгдүгээр сарын 8-ны өдөр нээхээр болсныг Гадаад харилцааны яамнаас өчигдөр /2023.01.04/ мэдээлсэн. Эхний ээлжид өдөрт 300 зорчигчийг автобусаар нэвтрүүлэх аж. Үүний дараагаас нь хоногт 500-1000 болгон зорчигчийн тоог нэмэгдүүлнэ гэж албаныхан мэдээлсэн. Эрээн хотын хил нээгдэхтэй холбоотойгоор “Найман шарга” худалдааны төвөөр юань хайсан иргэдийн хөл хөдөлгөөн ихэсчээ.
“Найман шарга” валют арилжааны төвийн гадуур юань хайн, валют сураглан холхилдох хүн цөөнгүй таарлаа. Харин арилжааны төвийн үүдээр ороход иргэд урт дараалал үүсгэн зогсч байв. Энэ дунд цар тахлын улмаас багагүй хугацаанд урд хөрш рүү яваагүй наймаачид ч байлаа.
Тэд эртхэн юань солиулж, урд хөрш рүү бараанд явахдаа бэлдэж буй нь энэ аж. Өнгөрөгч оны арваннэгдүгээр сард “Найман шарга” валют арилжааны төвийн юанийн ханш 470 төгрөг байсан бол хил нээх болсон гэх мэдээлэл цацагдсанаас хойш 504 төгрөг болж өсчээ. Мөн иргэдийн эрэлт ихсэхийн хэрээр юанийн нийлүүлэлт багасжээ.
ЮАНИЙН ХАНШ 34 ТӨГРӨГӨӨР ӨСЧ, ХОМСДОЛ ҮҮСЧЭЭ
“Creat capital” банк бус санхүүгийн байгууллагын ажилтан Б.Энхтөр “БНХАУ-ын хил нээгдэх сургаар иргэд олноор юанийн эрэлд гарснаар хомсдол үүсч, үнэ өссөн. Өнгөрсөн арваннэгдүгээр сарын эхээр юань 470 төгрөгөөр борлуулагдаж гүйлгээ хэвийн байсан бол Эрээний хил нээх сургаар буюу арванхоёрдугаар сарын сүүлээр 497 болж өссөн. Харин /2023.01.03/ ны өдрийн байдлаар юань 502 төгрөг байсан бол өчигдөр гэхэд хомсдол үүсч, 504 төгрөг болж өсөөд байна. Мөн цаашид ч эрэлт их байгаа тул өсөх хандлагатай байгаа” гэв.
Ченжүүд иргэдэд тодорхой хязгаарлалттайгаар юань зарж байлаа.
Гурван жил шахам Хятад яваагүй, нөгөө талаар сар гаруйн дараа цагаан сар болох тулд монголчууд Эрээн нээгдэх өдрийг тэсэн ядан хүлээж байна. Гэвч хүссэн болгон Эрээн гарчихгүй. Эхлээд 48 цагийн өмнө covid-19-ийн шинжилгээ өгсөн байх шаардлагатай. Мөн асуумж бөглөж, Хятадын хилийг нэвтэрнэ.
Тэгээд баяр дуусч, үнийн хөөрөгдөлтэй нийгэмд өрөө нэмсэн хүмүүсийн амьдрал үргэлжилнэ. Тиймээс валютын ханшаа тогтвортой барих тал дээр анхаарах хэрэгтэй гэж иргэд хүсэж байлаа.
Ийнхүү Эрээний нээгдэх сургаар Монголын эдийн засаг хөл хөдөлгөөнд орж эхэллээ.
Сэтгэгдэл бичих