Бүх нийтийн бэлэн байдлыг зэрэг тогтоосон хугацааг сунгаж нийслэлийн хэмжээнд хөл хорионы дэглэм үргэлжлэх болсонтой холбогдуулж зөвшөөрөгдсөн 15 салбарын ажилчдыг QR кодтой авто машинаар хөдөлгөөнд оруулцуулах болсон. Өчигдөр үдшээс хойш АТҮТ-ийн цахим хуудсанд хандан QR кодоо идэвхжүүлэх гээд амжаагүй, өглөө зайлшгүй ажиллах шаардлагатай эрүүл мэндийн байгууллагын ажилчдын автомашиныг буцаасан гээд энэ удаагийн зохицуулалт нь ихээхэн шүүмжлэл дагуулж байна. Дээрх асуудалтай холбогдуулан Улсын Онцгой комисс болон Нийслэлийн Онцгой комиссын Шуурхай штабаас тайлбар хийлээ.
“Өмнөх хөл хорионы үед хөдөлгөөнд оролцож байсан 41500 тээврийн хэрэгслийн эрхийг сэргээх замаар зохицуулалтыг хийсэн. Гурван салбарын тээврийн хэрэгслийн цагийг хязгаарлаагүй. Одоогоор хүнс түгээлт, цахилгаан, буяны ажил, эрүүл мэнд, хэвлэл мэдээллийн салбар гээд 31-32 мянган тээврийн хэрэгслийн эрх нээгдээд байна. Өмнөх зохцуулалтаас энэ удаагийн зохицуулалт өдрийн цагийн зохицуулалт хийж байгаагаараа ялгаатай. Үүнээс болж үл ойлголцол үүсэж байгаа тул цаашид засаж сайжруулаад явна. Одоогийн байдлаар 15 мянга орчим санал, гомдол ирээд байгаа. Эрүүл мэндийн байгууллагын 11 мянган тээврийн хэрэгслийг бүгдийг нь цагийн хязгаарлалтад оруулаагүй. Энэ салбарынхан байгууллагын харьяаны тээврийн хэрэгслээр цагийн хязгааргүй зорчино. Харин хувийн хэрэгслээрээ зорчиход цагийн хязгаараа мөрдөнө. Мөн хэвлэл мэдээллийн логотой авто машиныг цагийн хязгаарлалтад оруулсаныг эргэж харж зохицуулалт хийнэ” гэлээ.
Түүнчлэн Нийслэлийн тээврийн газраас өдөр бүр 750 тээврийн хэрэгсэл үйлчилгээнд явуулж байгаа тоог удахгүй нэмнэ. Гэхдээ нийтийн тээврийн хэрэгслээр зорчих иргэд биедээ ажлын үнэмлэхээ авч явах ёстойг санууллаа. Мөн нийтийн тээвэр өглөө 07.00-10.00 17:00-20:00 цагийн хооронд л үйлчлэх цагийн хуваарьт өөрчлөл оруулахгүй. Харин хөдөлгөөн зохицуулалтад өөрчлөлт оруулахаар судалж байгааг хэллээ.
Сэтгэгдэл бичих