Монгол Улсын Ерөнхий сайд Л.Оюун-Эрдэнэ өчигдөр ‘Засгийн газраас дөрөв, тавдугаар сарыг дархлаажуулалтын сар болгон үндэсний хэмжээнд зарлаж байна. Өнөөдрөөс дархлаажуулалтын хүчин чадлыг хоёр дахин нэмэгдүүлж, үндэсний хэмжээнд вакцинжуулах ажлыг эхлүүлж байна. Иргэдийн маань оролцоо өндөр байж чадвал тавдугаар сарын 01 гэхэд нийслэлийн насанд хүрсэн бүх иргэнийг, зургадугаар сарын 01 гэхэд хөдөө, орон нутгийн насанд хүрсэн иргэдээ тус бүр эхний тунд хамруулж, долдугаар сарын 01 гэхэд нийт иргэдээ хос тунгаар хамруулах томоохон зорилтыг дэвшүүлж байна.
Эрүүл мэндээ хамгаалж, эдийн засгаа сэргээх 10 их наядын цогц төлөвлөгөө амжилттай хэрэгжиж эдийн засгийн эхний эерэг үзүүлэлтүүд гарч эхэллээ. Олон улсын байгууллагууд үүнийг онцолж байна. Дархлаажуулалтдаа идэвхтэй хамрагдаж, ‘koвидгүй зуныг хамтдаа угтацгаая’ хэмээх уриалгыг дэвшүүлсэн юм.
Ерөнхий сайдын уриалгыг улс төр, бизнес, урлаг, спортын салбарынхан болон залуус дэмжиж, олон нийтийн сүлжээнд ‘Koвидгүй зуныг хамтдаа угтацгаая’ хэмээх гэрэл зурган давалгаа ид өрнөж байна.
Мэргэжлийн сүмо бөхийн 68 дахь их аварга Асашёрюү Д.Дагвадорж ‘Сайхан зуны төлөө’ хэмээн аяллын зургуудаасаа дэлгэсэн бол дуучин Нара ‘Koвидгүй зуны төлөө би ч бас нэгдсэн’ гэж жиргэлээ.
Мөн Киви хамтлагийн дуучин Ука, загвар өмсөгч Ц.Нямцэцэг нар ч ‘Дархлаажуулалтдаа идэвхтэй хамрагдаарай. Koвидгүй зуныг хамтдаа угтацгаая’ гэж уриалав. Ерөнхий сайд Л.Оюун-Эрдэнийн уриалгыг зөвхөн олны танил хүмүүс гэлтгүй салбар бүрийн залуус дэмжиж ‘Koвидгүй зуны төлөө хамтдаа. Маскаа зүүе, гараа угаая, хүн хоорондын зайгаа барья, дархлаагаа дэмжье, шаардлагагүй тохиолдолд олон хүнтэй газар очихоос зайлсхийе, вакцинаа хийлгэе’ хэмээн өөрсдийнхөө гэрэл зураг бүхий постуудыг фэйсбүүк, твиттер, инстаграм хуудастаа нийтэлсээр байна.
Сэтгэгдэл бичих