‘Kraken’ крипто биржийн захирал Жесси Пауэлл Блүүмбергт өгсөн ярилцлагадаа биткойны ханш ирэх арван жилд сая ам.долларт ч хүрэх магадлалтай гэж хэлсэн нь олон нийтийн анхаарлыг татжээ. ‘Биткойны ханш эхлээд сар, дараа нь ангарагт хүрч, дэлхийн валют болно’ гэж тэрээр хэлсэн байна.
Түүний энэхүү цочир мэдэгдэл гэнэтийнх биш бөгөөд Пауэлл өнгөрсөн зун биткойны ханш ирэх хоёр жилийн дотор 100 000 ам.доллар болно гэж зөгнөж байсан юм. Биткойны ханш ингэж өсч байгаа нь нөөцийн валют болж байгаатай холбоотой гэж эдийн засагчид тайлбарладаг. Гэхдээ одоохондоо ам.доллар дэлхийн хамгийн түгээмэл нөөцийн валют хэвээр байна. Биткойны ханш өнгөрсөн жил бараг дөрөв дахин нэмэгдсэн бол энэ оны нэгдүгээр сард 42 000, хоёрдугаар сард 57 000 ам.долларын босго давсан юм.
Биткойны ханшийн талаар ийнхүү өөдрөг төсөөлөлтэй хүмүүс байхад болгоомжлох нь ч бас байна. Тухайлбал, ‘Microsoft’ корпорацийг үүсгэн байгуулагч Билл Гейтс биткойнд хөрөнгө оруулахдаа болгоомтой байхыг сануулж ‘Та Илон Маск шиг баян биш л бол биткойн аваад хэрэггүй. Түүнд бол маш их мөнгө байгаа учраас биткойных нь ханш унана уу, өснө үү санаа зовох юм алга’ гэж хэлж байв.
Сэтгэгдэл бичих