Хууль зүй, дотоод хэргийн сайд Х.Нямбаатар жүжигчин Б.Навчааг цагдаад өгч, өдгөө прокурорын шатанд яллах дүгнэлт үйлдэж байгаа талаар мэдээлэл анхаарлын төвд байна. Энэ асуудлаар Хууль зүй, дотоод хэргийн сайд Х.Нямбаатар сошиал хаягаараа шууд дамжуулан тайлбар хийв.
Тэрбээр хэлэхдээ ‘Надтай холбоотой олон гүтгэлэг явж байна. Нэг нь 14-16 настай хүүхэдтэй бэлгийн харьцаанд орохыг хуулиар зөвшөөрсөн этгээд гэсэн гүтгэлэг явж байна. 16 насанд хүрээгүй хүнтэй бэлгийн харьцааны тохиролцож орох гэдэг заалт 1926 оноос хойших эрүүгийн хуулиудад зүйлчлэгдэж ирсэн заалт. Би 14 настай хүүхэдтэй бэлгийн харьцаанд орж болно гэсэн хууль огт санаачлаагүй. Өнгөрсөн сонгуулиар Сонгинохайрхан дүүрэгт надтай хамт нэр дэвшсэн нэр дэвшигчид энэ гүтгэлгүүдийг зохион байгуулалттай явуулсан. Энэ ажлуудыг гардаж явуулсан хүмүүсийн нэг бол би хэлмэгдчихлээ гэж ярьж байгаа Б.Навчаа гэж хүн. Би өөрөө охин хүүхэдтэй эцэг хүн. Охин хүүхэдтэй хүнийг 14 настай хүүхэдтэй бэлгийн харьцаанд ордог гэж гүтгэх нь аавуудад яаж тусах вэ. Энэ утгаараа өнгөрсөн зургаадугаар сард миний сонгуульд ажиллаж байсан хуульчид жүжигчин Б.Навчааг цагдаагийн байгууллагад өгсөн. Гэтэл энэ хэрэг нь прокурорын шатанд явж байгаа гэсэн мэдээллийг би өчигдөр авсан. Аливаа гүтгэлэгт хэмжээ хязгаар байх ёстой. Огт батлуулаагүй хуулийнхаа төлөө гэр бүл, үр хүүхэд рүүгээ дайруулдаг гүтгэлэгт цэг тавих ёстой гэдэг үүднээс Б.Навчааг цагдаагийн байгууллагад өгсөн’ гэв.
Сэтгэгдэл бичих