41 настай Дэниэл Прюд цагдаагийнханд саатуулагдах үедээ амьсгал нь боогдож амиа алдсан байна. Түүнийг хазаж, нулимах боломжгүй болгохын тулд толгойд нь уут угласан бөгөөд нүүрээр нь газар хэвтүүлж хоёр минут орчим дээрээс нь даржээ.
Прюд ухаан алдсан тул түүнийг эмнэлэгт хүргэсэн байна. Эмч нар аврах гэж хичээсэн боловч долоо хоногийн дараа аппаратыг нь салгахаас өөр аргагүйд хүрчээ. Эмч мэргэжилтнүүдийн дүгнэлтээр үхлийн шалтгаан нь амьсгал боогдсоноос болсон бөгөөд өвчтөний биеэс хүчтэй мансууруулах бодис илэрсэн нь улам хүндрэх шалтгаан болсон гэж үзэж байна.
Уг үйл явдал Нью-Йоркийн Рочестер хотод гуравдугаар сарын 23-нд болсон ч одоо л ил болж байгаа аж. Учир нь түүний гэр бүлийн өмгөөлөгч нарт цагдаагийн бичлэгийг нэхэмжилж, Прюд хууль сахиулагчдын эсрэг ямар нэг аюул заналхийлээгүй гэдгийг батлах хугацаа орсон байна.
Прюд Чикаго хотод амьдардаг таван хүүхдийн эцэг бөгөөд Рочестерт байдаг том ахындаа түр ирээд байжээ. Ах нь хэвлэлийн хурлаар мэдээлэл хийхдээ дүү нь сэтгэцийн асуудалтай байсан ба гуравдугаар сарын 23-ны өдөр өвчин нь хөдөлсөн тул тэрбээр цагдаа дуудсан гэжээ. ‘Дүүд маань туслаасай гэсэндээ би цагдаа дуудсан’ хэмээн Жо Прюд хэлсэн байна.
Цагдаагийн ажилтны энгэрийн камерын бичлэгт цас орж байсан ч Дэниэл Прюд гудамжаар нүцгэн гүйж буй нь бичигджээ. Цагдаа ирсний дараа тэрбээр шууд л шаардлагыг нь биелүүлж газар хэвтсэн бөгөөд “Би өөрөө, би өөрөө” гэж хэлж байгаа нь бичлэгээс сонсогдох аж.
Удалгүй хэвлэлийн хурлын дараа Рочестер хотын цагдаагийн газрын гадна эсэргүүцлийн жагсаал эхэлсэн байна.
Нью-Йорк мужийн ерөнхий прокурор уг хэрэгт мөрдлөг явуулж байгаа талаар мэдэгджээ. Гэвч Прюдийг баривчлах үед байсан цагдаагийн алба хаагчид ажлаасаа халагдаагүй байна.
Эх сурвалж: ВВС
