Интернэтэд хүний санаанд оромгүй зүйл хүмүүсийн анхаарлыг татах нь бий. Sobat Miskin Official хэмээх YouTube сувгийг хөтөлдөг Индонезийн влоггер залуу 2 цаг 20 минутын турш юу ч хийлгүй, компьютерийн дэлгэц ширтэж суугаа бичлэгээ оруулсан нь сошиал ертөнцийн ярианы сэдэв болж байна.
Үзэгчид нь түүнээс арай илүү үр өгөөжтэй, ‘боловсролын’ контент хийхийг хүссэн бөгөөд үр дүнд нь тэрбээр ийм бичлэгийн санааг олсон гэнэ. Тэр “Гарчигт бичсэнчлэн би хоёр цагийн турш юу ч хийгээгүй. Энэ видео хэрэгтэй юу үгүй юу гэдгийг та бүхэн л шийднэ. Тухлан сууж үзээрэй” гэсэн хошин тайлбар бичжээ. Сонирхолтой нь, энэ бичлэгийг YouTube-т 3.1 сая хүн үзээд байна.
Гурван цагийн турш чив чимээгүй, юу ч хийхгүй суусан өөр нэг влоггерын бичлэгийг 377 мянган хүн үзжээ.
Сүүлийн саруудад Индонезид трэнд болж байгаа энэ төрлийн бичлэг аль 2013 оноос үүдэлтэй юм байна. Тухайн үед, Rens Cools нэртэй YouTube сувгийг хөтлөгч влоггер 8 цагийн турш юу ч хийлгүй, бүтэн өдрийг буйдан дээр сууж өнгөрүүлсэн бичлэгээ оруулж байв.
Мөн өнгөрсөн тавдугаар сард Бенджамин Беннетт хэмээх влоггер дөрвөн цагийн турш тасралтгүй инээмсэглэж суугаа бичлэгээ оруулж байсан. Тэрбээр ийм төрлийн 300 орчим бичлэг оруулсан байх бөгөөд тус бүрийг нь хэдэн зуун мянган хүн үзжээ.