Аж үйлдвэр, эрдэс баялгийн яамнаас Шатахууны шуурхай штабын талаар мэдээлэл өглөө.
Аж үйлдвэр, эрдэс баялгийн дэд сайд Б.Мөнхтамир “ОХУ-ын Ангарск нефтийн үйлдвэрээс аравдугаар сард захиалсан 57 мянган тонн шатахуунаас 51 мянган тонн нь ирсэн. Үлдсэн 6,000 тонн шатахуун замдаа явж байна.
Улсын хэмжээнд АИ-92 шатахууны 12 өдрийн нөөцтэй байна. Дизель 28, онгоц 36 хоногийн нөөцтэй байна.
Арваннэгдүгээр сард гадаад улсуудаас нийт 92,000 тонн шатахуун авахаар баталгаажуулсан. Цаашид ОХУ-аас арваннэгдүгээр сарын захиалгыг нэмэгдүүлж, 70,000 тонн болгосон. Мөн Казахстан улсаас 3,000 тонн, Хятад улсаас 8,000 тонн, Солонгос улсаас 12,000 тонн буюу нийт 92,000 тонн шатахууны захиалгыг баталгаажуулаад байна.
Өнгөрсөн долоо хоногт Шинэ эрин ХХК-ий шинээр барьж буй 16,000 метр.куб шатахуун нөөцлөх сав ашиглалтад ороход бэлэн болсон гэв. Шатахууны савыг нэмэгдүүлэх нь нөөцийн хэмжээг нэмэгдүүлэх чухал алхам юм.
Улаанбаатар Төмөр замд 6-8 хоногийн шатахууны нөөц байна. Мөн цаашид шатахуун тасрахгүй гэдгийг мэдэгдэж байна. Жолооч нар шатахуунд дугаарлалгүй, дуусах үед нь шууд очоод авчхаж болно” гэлээ.
Үргэлжлүүлэн, 10-11-р сар бол зуны түлшээс өвлийн түлшид шилждэг үе. Гэтэл вагоны эргэлт маань урт байгаа учраас хүлээгдэл үүсч байгааг ойлгох хэрэгтэй.
Мөн энгийн АИ-92 автобензинийг АИ-95 хэмээн зарж байна гэсэн гомдол ирсэн. Хилээр орж ирж буй шатахуунд шинжилгээ хийдэг учраас тийм зүйл байхгүй.
Хөгжлийн бэрхшээлтэй иргэд нэг удаа шатахуун авах биш өдөрт 4-5 газарт очин шатахуун авч байна” гэв.
Сэтгэгдэл бичих