НИТХ-ын төлөөлөгч Б.Эрдэнэсүхэд холбогдох гэр бүлийн хүчирхийллийн хэргийн гэм буруугийн шүүх хурал маргааш буюу есдүгээр сарын 18-ны 09:00 цагт Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхэд болно.
НИТХ-ын төлөөлөгч Б.Эрдэнэсүх гэр бүлийн хүчирхийллийн хэрэгт холбогдон, улмаар хэрэг нь шүүхэд шилжээд буй. Түүнд холбогдох хэргийн шүүхийн урьдчилсан хэлэлцүүлэг өмнө нь Баянгол, Хан-Уул, СХД-ийн Эрүүгийн хэргийн анхан шатны тойргийн шүүхэд болж, хэргийг нэмэлт мөрдөн байцаалтад буцааж байсан.
Түүний гэм буруугийн шүүх хурал өнгөрсөн наймдугаар сарын 24-нд товлогдсон ч шүүх хуралдааны үеэр Б.Эрдэнэсүхийн өмгөөлөгч нарын зүгээс шүүх хуралдааныг хойшлуулах санал гаргасныг шүүх бүрэлдэхүүн хүлээж авсан.
Б.Эрдэнэсүхийн өмнө нь үйлдэж байсан гэр бүлийн хүчирхийллийн тухайд:
Түүний эхнэр болох хохирогч О.Н хамрын хагалгаанд гурван удаа орж байжээ. Мөн нэг удаа аав ээжтэйгээ холбоогүй 10 хоножээ. Хохирогчийн аав охиноо сураглан гэрт нь очиход босож ч чадахгүй хэвтэрт орсон байж. Аав ээж нь охиноо аваад гэртээ очсон ч хаалгыг нь цөм өшиглөн эвдэж ороод О.Н-ийн толгойтой үсийг хуйханд нь тултал бүгдийг нь хяргаж байжээ.
Хүн болгоны мэдэх хамгийн наад захын жишээ бол хүмүүс эхнэр, нөхөр гээд гэрлэлтээ батлуулах үедээ л хайрлаж, хамгаална гэж тангараг өргөдөг. Гэтэл эхнэрээ хээр аваачин, зэрлэгээр зодож, хамрыг нь хугалж, биеийг нь хөх няц болтол нүдэж байсан нь хүнлэг ёсноос гажууд байлтай.
Б.Эрдэнэсүх өмнө нь гэр бүлийн хүчирхийллийн хэргээр 30 хоногийн баривчилгаанд явж байсан ч хаширсангүй. Мөн гэр бүлээс гадуурх харилцааг үргэлж үүсгэн бие болон сэтгэл санааны хүчирхийллийг 22 жилийн турш хохирогч Н-д үзүүлсэн байгаа юм.
Б.Эрдэнэсүх зөвхөн гэр бүлийн хүчирхийлэл үйлддэгээс гадна олны танил фитнесийн тамирчин эмэгтэйтэй гэр бүлээс гадуурх харилцаа үүсгэсэн байгааг түүний ойрын хүн нь хэлсэн билээ.
Сэтгэгдэл бичих